Den e lucha pa clasificacion pa serie semi final di futbol division femenino di AVB, e ekipo di La Fama Damas a logra un triunfo importante riba su rival Riverplate logrando un triunfo cu anotacion di 3-0.
E triunfo a bira esun shete di temporada pa e ekipo di Savaneta y combina c’un empate y tres derota, La Fama a logra acumula un total di 22 punto y consolida su posicion na di tres puesto.
Un victoria sin duda hopi importante den e lucha pa clasificacion caminda e ekipo awor a saca bentaha di 7 punto riba Riverplate cu ta na di cuater puesto y 8 punto riba Dakota cu ta ocupa e di cinco puesto.
La Fama a subi tereno cu Hadassah Kock en gol, e liña defensivo a wordo forma pa Avril Maldonado, Francien de Windt, Nicole Garcia y Shaquera Rodriguez y den medio campo a hunga EdrianaMolina Gonzalez Algesha Sweetnam, Jeyceline Werleman y Shadira Croes mientras cu e liña di atake a wordo forma pa Nikita y Yenhifer Huntington.
Den e prome minuutnan di wega Riverplate tabatin su miho momento y a yega hopi cerca di anota pero un bon reaccion di e defensa Francie e Windt a evita cu e ekipo di Madiki por a saca bentaha den e minuutnan inicial.
La Fama poco poco a cuminsa domina e medio campo y a cuminsa crea situacionnan di gol caminda entre otro Shadira Croes a bay su do riba portero di Riverplate pero aki e portero a logra di blokia e tiro y evita e gol asina.
Sinembargo riba un atake cu a cuminsa den defensa y e bala a yega cerca e medio campista Jeyceline , kende ta manda un pase largo pa Yenhifer Huntington kende ta bay laga e defensa pa despues supera e portero y asina duna La Fama bentaha di 1-0.
E ekipo di Savaneta a keda peligroso pero a faya varios bon situacion di gol te ora cu defensa di Riverplate comete un infraccion den area penal y referi pita pa penalty y aki tabata e maximo anotado di e division di damas, Shadira Croes kende ta anota e tiro aki pa pone La Fama riba 2-0.
Den di dos tempo e situacion no a cambia caminda La Fama a mustra e miho ekipo riba tereno, mustrando mas rapides y solamente na un ocasion portero Hadassah mester a interveni pa evita un gol di Riverplate cu despues no a bira mas peligroso pa resto di e periodo aki.
La Fama a sigui domina e medio campo y dado momento Shadira a avansa riba e banda robes di tereno y a duna un centro cu Yenhifer Huntington ta pusha e bala over di cabes di portero di Riverplate pa duna La Fama bentaha di 3-0 y cu cual anotacion e partido a termina tambe.
E proximo compromiso di La Fama ta dia otro siman 20 di maart ora cu nan topa cu Dakota den un wega crucial y caminda e ekipo di Savaneta por sigura su clasificacion den wega du lo wordo hunga den Compleho Deportivo Frans Figaroa pa 8’or di anochi.
Riverplate lo mira accion atrobe diamars 19 di maart ora cu e enfrenta e ekipo di Deportivo Nacional pa 8’or di anochi den Compleho Deportivo Guillermo Prospero Trinidad na Dakota. E prome dos ekiponan cu a logra nan clasificacion caba ta e ekipo di RCA cu tin 30 punto den 12 wega hunga y tambe e ekipo di Britannia cu tin 28 punto pero den 10 wega hunga caminda tur dos ekiponan aki no a conoce derota ainda e campeonato aki.
