Pa basta tempo den Dominicanese straat tin un auto Chevrolet color oranje bandona. Desde cu e auto a keda bandona na e sitio aki, e doño di e auto no a percura pa bin busca esaki mas.
Habitantenan di e area a tuma contacto cu instancianan concerni pidiendo asistencia pa bin bay cu e auto aki. Pero niun instancia concerni, manera Polis, City Inspector y otro, no a worry pa bin controla e auto y pa bay cu esaki.
Habitantenan ta cansa di e situacion aki, pasobra chollernan ta pasa y ta kibra den e auto pa mira kico tur nan por bay cun’e. Recientemente a sosode un accident den e area, unda cu un auto a bin dal den e Chevrolet. Tur dia por mira e auto para den Dominicanese straat y e ta un mahos bista p’e habitantenan. Nan ta puntra ki dia un di e instancianan concerni lo haci algo pa asina bay cu e auto for di e sitio. Nan kier sa si polis no por hiba esaki na warda di polis, of si City Inspector por haci algo pa nan bay cu e auto aki.
E situacion ta uno fastioso p’e habitantenan y ta pidiendo pa instancianan concerni haci algo. tambe nan ta pidi na esnan cu por sa ken ta doño di e auto, p’e bin busca esaki pasobra para eynan e auto ta sigui bay atras mas di loke e ta caba. Habitantenan di Dominicanese straat ta pidiendo instancianan concerni pa bay cu auto bandona pa hopi tempo.
