Horcan Dorian a suta e isla di Bahamas na momento cu e tabata categoria 5, lagando daño nunca bisto atras. Dado momento lama y tera a uni; niun hende tabata sa mas unda lama ta caba y suela di Bahamas ta cuminsa.
Un mama ta grita: Mi ta cu mi yiu di 4 aña, resa pa nos, resa pa nos”. Esaki tabata un di e tantisimo gritonan di ayudo cu por a scucha den e diferente grabacionnan cu tin riba Internet. Segun e pronostico, e bientonan di 155 miya pa ora y yobida lo sigui suta e isla awe dialuna, prome cu e tuma direccion di Florida. Den algo palabra: Dorian ta un tormenta brutal.
Tin areanan unda cu e awa tabata 7 meter halto (23 pia) . Esaki ta mas halto cu mayoria di e casnan na Bahamas. Con hopi e daño ta dificil pa bisa, mirando e problema cu e sistema di comunicacion, segun Prome Minister Hubert Minnis: “Probablemente esaki ta e dia di mas tristo y tambe esun pio den mi bida pa dirigi mi mes na e pueblo di Bahamas. Como dokter mi ta entrena pa soporta di mira hopi cos, pero nunca algo manera esaki.”
E videonan cu a bin ta saliendo riba Internet ta mustra casnan destrui, camindanan inunda y habitantenan yorando pa ayudo y oracion.
Ta pronostica cu Dorian lo move hopi cerca di costa di Florida laat awe nochi y djey bira nortwest. Como preparacion, Presidente Donald Trump a declara un estado di emergencia. Gobernador DiSantis a saca ordo di evacuacion y 72 cas di cuido a wordo evacua. Sperando riba Dorian, a manda yama mas cu 4 mil trupa di Guardia Nacional y companianan di coriente ta prepara pa mobilisa 17 mil trahado pa atende cu caida di coriente.
