Campeonato HEINEKEN femenino fast pitch di Aruba Softball Bond dedica na Jacobo Jansen y Gilbert “ Nando” Maduro a continua riba canchanan na Pos Chiquito.
Den categoria Femenino AA Jaguars Vitamin Water a enfrenta e equipoo di Sta Cruz esta Rockets. Rockets ta pika ariba den cabez di promer cu 1 careda pero mesora Jaguars ta responde den bom di mesun inning cu 3 careda. Rockets ta bolbe rally pa 3 careda den cabes di 2 inning pa bay ariba 4-3. Den bom di 3 inning Jaguars ta rally pa 3 careda y ta bolter e score 6-4.
Rockets no ta baha cabez y ta anota 3 careda pa tuma rienda di e partido 7-6. Jaguars a keda pone precion y ta anota 2 careda den bom di 4 inning pa bolter e score na su fabor 8-7. Pitcher a preta brasa den final pa Jaguars seya e victoria. Boxscore final Jaguars Vitamin Water 8 careda, 2 hit, 2 error y ta laga 6 coredor na base. Rockets 7 careda, 7 hit, 2 error y ta laga 5 coredor den circulacion. Mihor bateadornan pa Jaguars ta Jennysela Tromp 1-1 cu un doblete mas 1 rbi y 2 careda anota, Raquel Wester 3-1 mas 2 rbi ta unico dos bateadornan di Jaguars cu a bati hit. Pa Rockets a destaca na plato Emileen Kock 1-1 cu un rbi y 2 careda anota, Mildred Kock 3-2, Frangeline Danies 3-1 cu 2 rbi, Elianne Shakira Kock 3-1 cu 1 rbi, Liane Tromp 3-1, Zulaima Croes 3-1. 
Mester acentua Mama Mildred Kock y dos juinan Emileen y Shakira tur a bati hit den e wega aki. Algo cu masha poko sa tuma lugar pero si bunita pa aprecia. Kathleen Emerenciana ta inicia e partido y ta bay 3 inning tirando 23 bola, 40 strike permitiendo 4 careda tras di 4 hit ponchando 3 bateador y ta regala 2 base por bola pero no ta haña ningun desicion riba su nomber. Carolina Werleman ta drenta releva den cabez di 4 inning y ta enfrenta 11 bateador tirando 22 bola, 19 strike pa un total di 41 lansamento y ta permiti 3 careda tras di 3 hit , ta regala 3 base por bola y ta poncha 1 bateador seyando e victoria riba su nomber. Shakira Kock ta lansa 3 inning y 1 tercio enfrentando 21 bateador lansando 48 bola, 42 strike pa un total di 90 pitch permitiendo 8 careda tras di 2 hit, regalando 8 base por bola y ta poncha 4 bateador y ta bay cas cu e derota. 
Frangeline Danies ta drenta releva y ta tira 2 tercio di un inning enfrentando 5 bateador lansando 23 pitch propinando un ponche y ta regala 3 base por bola. Campeonato U17 ta continua diahuebs awor pa 7pm sharp sharp na Pos Chiquito momento e muchanan di Sta Cruz esta Rockets U17 midi forsa contra e muchanan di Noord esta Lady Blue Marlins. Un categoria cu sigur fanaticada mester respalda. Diabierna 6 di September den categoria femenino AA pa 7pm Rockets vs Eagles y pa 830pm Aruba Bank Lady Tigers vs Jaguars Vitamin Water. Diasabra 7 di September pa 3pm Lady Blue Marlins vs Eagles (U17) y pa 5pm Jaguars Vitamin Water vs Eagles femenino AA. Pues e siman aki nos tin compromiso cu softball femenino na Pos Chiquito. Softball a la carga!!
