Icho Matos di Guarda nos Costa ta conta cu hendenan cu yega na frontera, hopi biaha ora cu hendenan pidi asilo, miembro di imigracion mester bati na nan porta. Con cu bay bin, hopi a pasa asina bin aden y algun di nan ta bin cu un carta traha cu nan a paga p’e.
E ta comenta cu nan ta haya awor aki, door cu fronteranan ta cera y no a wordo cera door di Aruba. E decision tabata den man di e pais cu a cera e fronteranan. Ta papiando di tratado pa loke ta e aspecto di asilo. Na cuminsamento e no tabata cana corecto manera mester tabata. Tabata tin promesanan cu tabata wordo haci pa no bisa estafa y tabata crea problema.
Tabata tin hende cu tabata haci ganashi riba custia di e hendenan aki, haciendo tur tipo di promesa, ta loke a aumenta drasticamente. Pasonana wordo tuma contra e personanan cu tabata haci esey. No ta zomaar cu bo yega pidi asilo, pasobra no ta tur hende por. Tin hende cu ta huy pa motibonan economico/financiero, pa motibo di hamber, remedi, of pa un of otro motibo. Tambe tin hendenan cu a wordo deporta caba y a haya e palabra magico di Asilo y ta haci mal uzo di e tratado eynan. Esey ta keda den man di otro instancia, cu tin den un lapso di tempo tuma e decision corecto y avisa e hendenan cu tin cu bay bek nan pais.
Simplemente nos mester para y bisa e berdad e cos manera e ta y no traha mentira cu tin violacion di derechonan humano.
Matos a splica cu e detenidonan ta wordo trata di tal manera bon. Hopi biaha e trahado di Guarda nos Costa, ta e ultimo di come un pan of haci algo. Ta tene debidamente cuenta cu e derechonan humano di e hendenan aki. Tin cu para y papia berdad. No mester traha storia cu no ta cuadra. Si tin un caminda cu tin duda, portanan di Guarda nos Costa ta habri. No tin nada di sconde. No ta un proceso caminda cu tin cos di sconde. Simplemente bati na porta y sra. Hassel ta mas cu dispuesto pa trece e berdad y si mester, pasa wak e situacion tambe. No tin nada di sconde.
Carta
Cada instancia ta na altura y cada instancia a tuma pasonan cu nan tin cu tuma. Cada instancia ta haci su trabao y nan ta debidamente na altura di e malpractica kico ta wordo uza, of e promesa, uzando e tratado di asilo of tratado di derechonan humano of di Cruz Cora, haci promesanan, caminda cu kisas tin hopi biaha placa ta circula y otro hendenan ta haci ganashi, riba custia di Pais Aruba.
E carta ey ta algo cu a bin dilanti na cuminsamento, caminda cu Guarda nos Costa no tabata na altura di dje. Di pronto a sali y a tuma nota di dje y medidanan a wordo tuma, pasobra el a wordo papia. Personanan concerni a trece e punto aki, pesey cierto medidanan a wordo tuma den e organisacion internacional, pa e forma con e cartanan aki tabata bay. Pesey no ta haya e cartanan ey ta circula mucho mas.
Nan no tabata prepara pa e cos aki. Ora cu esaki a bin ta sosode, poco poco e pasonan a wordo tuma y cosnan cu tabata bay for di sla a wordo drecha. Asina ta canando dia pa dia tras di cada situacion cu ta presenta.
Ora cu nan menciona e palabra asilo y mencion’e corectamente, e ta wordo hala un banda, ta sigui e proceso cu tin cu wordo sigui. E momento cu intake tuma luga, e documentonan ta bay na e instancianan concerni cual ta Dimas, cu tin su hendenan riba nivel pa haci e sondeo, di en berdad ta papia di un proceso di asilo politico, si of no. Si no ta asina, e ora ey ta cuminsa e proceso legal. Ta presenta dilanti hues comisario y tur e proceso cu tin cu cana den un caso asina aki.
Segun Matos, ta un proceso cu ta canando hopi mas lihe di loke tabata canando na cuminsamento, ora cu nan a cuminsa enfrenta e situacion.
Frontera cera un alivio?
Den e asunto di asilo, no ta Imigracion y Guarda nos Costa so. Tin mas departamento envolvi, manera Aviacion Civil. Na momentonan cu nan tin mester cu INAC, cu ta esun cu a tuma e decision a base di e instruccion di e persona di e pais bisiña. Esey ta contactonan cu ta tuma luga. Mester ta cauteloso si. Nan ta pidi lista di hende y ora cu manda hende, por ta ta hendenan cu nan ta warda na e aeropuerto cu nan ta yega, nan ta wordo horta, nan ta wordo asalta of tin biaha te hasta nan ta pasa e lista delanta, pa wak ken nan por recluta pa hinca den ehercito. Ta cosnan cu ta masha cauteloso cun’e. Ta hopi mas cos cu ta pasa, cu hopi hende no sa y cu ta teniendo cuenta cu nan.
Pero cu e frontera ta cera, ta un alivio. Pasobra no ta hayando manera tabata na cuminsamento, no tin e abuso ta tumando luga. Esey tambe a para. Pero ta para awor aki na e situacion con ta procesa e hendenan aki pa no viola nan derechonan y ta teniendo debido cuenta cu esey.
