Diabierna den oranan di atardi un grupo di ciudadano cu ta defende derecho igual pa tur hende, a bini hunto na Wilhelminapark.
Diahuebs ultimo Parlamento mester a trata e ley di derecho igual pa parehanan di mesun sexo, pero e reunion finalmente no a sigui.
Egmar Yrausquin, kende ta presidente di e organisacion LGBT a splica cu e idea tras di e grupo ta pa mustra cu tur hende mester tin mesun derecho.
Parlamento a vota pa un amienda, cu no tabata esun original cu a minimalisa loke nan tabata lucha p’e. Awo, despues di casi 5 aña, nan mester a pasa e ley. E ta un ley cu mester a drenta na vigor. Nan ta lamenta cu a pospone e reunion aki “tot nader orde”.
E motibo pakico ta keda pospone nan no sa, kisas e no ta e momento ideal. E ta algo cu por a pasa for di basta tempo caba y pas’e awo den porta di eleccion ta un tiki dificil. Pero esey no ta culpa di ningun hende.
Por corda, cu Corte a expresa su mes na diferente ocasion riba e tema aki. Nan a bisa cu si no por ofrece matrimonio di mesun sexo, mester duna nan algo similar cu ta respeta derecho di parehanan di mesun sexo.
Desiree Croes, un activista tambe tabata presente. El a splica cu e amienda a pasa for di 2016 caba. Aruba ta e ultimo pais den Reino, pasobra e no a pasa ainda. Aruba ta e unico den Reino cu no tin un posibilidad pa registra union di pareha di mesun sexo. No ta compronde cu algo cu a pasa caba, mester warda pa haya e derecho igual. Awo parehanan di mesun sexo ta hopi vulnerabel. Si un di nan fayece, e otro ta keda desampara, sin ningun derecho.
