Dia 13 di mei 2021 e alumnonan di Facultad di Turismo di Universidad di Aruba a bishita Donkey Sanctuary. A entrega nan donacion di AWG 2,200 (dos mil, dos shen florin) na e fundacion Donkey Sanctuary Aruba, tambe registra como Fundacion Salba Nos Burico. Como parti di nan curriculum universitario, en conexion cu nan curso di MICE: Meetings, Conventions and Events, e studiantenan mester a organisa diferente evento como parti di nan studio experimental. A dicidi cu cada grupo lo organisa un evento pa recauda fondo pa un fundacion den comunidad y asina reenforsa responsabilidad social den nos comunidad. Como parti di un desaroyo sostenibel, un di e aspectonan importante, ta e bienestar di nos mes un comunidad.
Di e forma aki, durante luna di april 2021, diferente grupo for di Facultad di Turismo a organisa fundraising pa diferente fundacion, entre otro Stichting Rancho cu vitual workshop con ta sembra bo mes un fruta y berdura nan, diferente actividad pa recauda fondo nan pa Fundacion Respeta Mi, Fundacion pa Nos Comunidad y Luna Foundation, Telefon pa Hubentud, entre otro nan, y den e caso aki, tambe un di e grupo nan a recauda fondo nan pa Donkey Sanctuary.
Na 1997 a funda Donkey Sanctuary y den nan cuido tin 121 burico, caminda cu nan por tin un habitat natural, un luga pa biba cu suficiente cuminda, awa, suficiente sombra for di solo y tambe fruta nan dushi pa come como treat. Burico a yega Aruba den aña nan 1500 y nan tabata tin un rol hopi importante den e distribui awa na Aruba. Tambe como medio de transporte y pa transporta comestibel, etc. Den e añanan 1900 a reemplasa e buriconan pa auto y nos hendenan no tabata tin mester di nan burico mas. A laga nan den libertad y riba nan mes.
For di e 121 burico cu tin den 40,000 meter di Donkey Sanctuary, 60% ta masculino y 40% femenino. Burico ta biba un promedio di 35 aña. Cada un burico ta come 2 kilo di hay pa dia, y por lo menos 500 gm di pellets pa dia. Cada un ta bebe 4 galon di awa pa dia. Cada burico ta costa aproximadamente $60 pa luna pa cuida debidamente. Durante e lock down cu Aruba a pasa pa motibo di COVID, casi no tabata tin bishitante y esaki a pone cu a bira hopi dificil pa por a cuida e 121 burico cu tin na e sanctuary. El a bira un preocupacion cu nan lo mester a cera nan porta of kisas habri nan porta y laga e buriconan liber. Pero hopi di nan no por cuida nan mes si laga den libertad. Nan ta biba na e Donkey Sanctuary caminda nan ta liber for di cualkier maltrato, y liber for di accident nan di trafico. Como evento pa recauda fondo, e studiantenan a organisa benta di snack boxes durante diferente dia nan pa por a yega na e bunita donacion di AWG 2,200.00.
E fundraising aki pa Fundacion Salba Nos Burico tabata organisa p’e siguiente studiantenan: Jose Marcano, Amber Salazar, Kenia Rodriguez y Hannah Lee. E studiantenan aki kier a gradici nan docente di MICE: Jo-Ann Croes, Staff di Universidad di Aruba specialmente Facility Management Team pa nan cooperacion, marketing department y Circle K Club di Universidad, Tostao Canteen, tur amigo, famia, y colega cu a contribui na e fundraising. Un danki special ta bay na Setar NV pa nan donacion, Don Pastechi Factory y Marcano’s Kitchen, entre otro. Na tur esunnan cu a aporta na e Snack Sale Fundraising, un gradicimento special. Tambe kier a corda comunidad di Aruba cu Donkey Sanctuary situa na Bringamosa 2Z ta habri diariamente di 9:00 am pa 4:00 pm, entrada ta gratis y e buriconan ta amigabel. E ta un leuk luga pa relaha y pa bishita como famia. Por cumpra diferente baki nan di cuminda pa duna nan di come y coopera cu e fundacion.
Riba potret por mira momento nan duranti e Snack Sale y entrega di e donacion.
