Club Kibrahacha a organisa un “Summer Camp” pa adulto mayor, e actividad aki a cuminsa dia 11 di juli y ta termina dia 5 di augustus. Mary Prins, di Club Kibrahacha 60, a conta cu dialuna mainta e adultonan mayor a yega hunto na YMCA Dakota.
Durante e mainta aki na Dakota e grandinan a siña con pa traha guacamole. Pa cuminsa dos experto a haci e demostracion di con pa traha e guacamole y despues e grandinan a sigui e instruccion. Despues cu nan a caba di trah’e, nan mes por a disfruta di dje. Tin algun a probecha y a bay cu un poco cas pa disfruta di dje mas den ora di atardi.
E meta principal di e actividadnan aki ta debi na e “Summer Camp”, normalmente e ta organisa e actividadnan aki tur aña pero pa motibo di Covid mester a stop. Pa diescinco dia largo tin actividad p’e adultonan mayor.
Motibo cu a scoge pa organisa un kamp pa adulto mayor ta cu semper ta organisa kamp pero pa mucha y hoben. Club Kibrahacha ta di pensamento cu ta importante pa e adultonan mayor tin cierto conexion cu otro. Mayoria bes a traves di kamp nan ta siña mas di Club Kibrahacha y ta dicidi di uni nan mes n’e grupo.
E clientenan a disfruta di e actividad, nan mes no por a kere kico tur nan a siña. Pa loke ta e actividadnan cu falta ta; core rond di Aruba y tambe haci ehercicio na Club Roy.
Club Kibrahacha ta ofrece diferente actividad y servicio na e grupo dinamico di 60+, pa asina conhuntamente traha riba un bida largo y saludabel.
