Seroe Biento Boys Bikers Club ta organisa un otro bike ride cu ta tuma luga e fin di siman di 22, 23 y 24 di september. Nan ta haci e bike ride aki c’un meta y e biaha aki e recorido ta pa Fundacion Autismo Aruba.
Delwyn Hernandez, presidente di Seroe Biento Boys Bikers Club, a indica cu esaki ta di tres biaha cu ta organisa e Rowley Hernandez Bike Ride. Tur aña nan ta scoge un fundacion. E biaha aki nan a scoge pa dedica esaki n’e Fundacion Autismo Aruba. Parti di e inscripcion ta bay p’e fundacion. Hernandez a sigui indica cu aña pasa nan a conta cu 200 participante y nan a scoge e fundacion di Jon Fun, cual ta uno cu ta yuda duna pan n’e muchanan di scol. Inscripcion pa participa n’e bike ride ta tuma luga dia 20 di september na Joan Bar desde 7:00 pm. Costo pa participa ta di 60 florin y den e pakete e participante ta haya un t-shirt, pin, desayuno y almuerso, cos di bebe y tambe ticket pa disfruta di e tres dianan di ride.
