Gobièrnu di Kòrsou ta sigui prepará pa krísis òf kalamidatnan ku por asotá nos pais

Dia 6 i 7 di yüni último representantenan di Direktorado di Kontròl di Riesgo i Maneho pa Kalamidat i Direktorado di Asuntunan Eksterior (Min. AZ.) a atendé e konferensia titulá “Human Mobility in the Context of Disasters and Effects of Climate Change in the Caribbean” na Trinidad & Tobago.

E konferensia a ser organisá dor di Caribbean Migration Consultations, Platform on Disaster Displacement, International Organization for Migration i UNHCR (The UN Refugee Agency). Un total di 15 paisnan di den Karibe a atendé e konferensia akí, entre otro Aruba, St. Maarten, Trinidad & Tobago, Jamaica, Guyana, Surnam, British Virgin Islands, Antigua & Barbuda, Cuba, St. Lucia i St. Vincent & The Grenadines. E diferente paisnan a manda representante di entre otro nan organisashonnan di desaster, imigrashon i ministerio di Defensa. Alabes tabatin representante di CDEMA (Caribbean Disaster Emergency Management Agency), UN Refugee Agency Platform i di UNDRR (United Nations Disaster Risk Reduction).

Meta di e konferensia tabata pa wak kon ta atendé ku persona ku pa motibu di efektonan di klima, por ehèmpel orkan, mester a bandoná nan pais i evakuá pa un otro pais. A papia di e diferente kriterio di kon e prosedura di evakuashon tin ku kana i kon paisnan den Karibe por traha huntu pa yuda persona ku pa motibu di un kalamidat lo no por regresá nan pais mesora. Tambe a trata tópikonan ku tin di aber ku migrashon, efektonan di kambio di klima riba paisnan den Karibe, kon por brinda otro yudansa den kuadro di kalamidat fortifikando relashonnan den eksterior, interkambio di konosementu, i eksperensia den kuadro di preparashon pa krísis i kalamidat den Karibe.

Kòrsou tin eksperensia den brinda yudansa na evakuadonan di otro pais. Na aña 2017 despues di e impakto di orkan Irma na St. Maarten, Kòrsou a fungi komo ‘First Safe Port of Entry’ pa evakuadonan di St. Maarten. Mirando e eksperensia di 2017 i teniendo kuenta ku un situashon di evakuashon por presentá den futuro atrobe, e konferensia a kontribuí pa sa kua proseduranan i tambe leinan mester ta vigente durante un situashon asina. Ademas, un situashon di desaster por presentá na Kòrsou mes tambe. P’esei bon preperashon i koperashon ku otro pais den region ta nesesario i di suma importansia.

Gobièrnu di Kòrsou ta sigui prepará pa mitiga e efektonan ku un krísis òf kalamidat por tin riba Kòrsou. Preparashon pa temporada di orkan ku a start 1 di yüni 2019 i ta terminá 30 di novèmber tambe ta andando. Regularmente e ‘Rampenbeheersingsorganisatie’ di Kòrsou ta reuní i tambe frekuentemente ta trein. Pa keda informá aboná riba e number di ‘Whatsapp Kalamidat’ mandando un mensahe pa 519-1234. Tambe por bishitá nos wepsait: www.kalamidat.cw. ‘Download’ nos app ‘Kalamidat’ grátis den ‘App Store of Google Play’ i bishitá nos pagina di Facebook: RisicobeheersingCuracao.

Comments

comments