E fronteranan cera entre Aruba cu Venezuela ta algo cu mester wordo mira cu diferente wowo. Actualmente gobierno ta na un crusada importante pa tuma un decision pa scapa pan di mas cu 200 tata di famia trahando na Aruba Airlines y na W-Aviation cu ta e airport priva. E frontera cera por hiba na cierre di ambos cu lo nifica tambe cu basta trahado ta bay cas!
E deseo no ta pa habri e frontera 100%. Simplemente mester habri e frontera pa e comerciantenan di Venezuela cu mester bin Aruba cu nan avion priva. Esaki no ta avionnan cu ta bin cu hendenan cu ta bin pidi yudansa. Ta comerciantenan doñonan di avionnan cu ta bin uza e facilidad di airport priva pa pasa tambe dianan cu nan famia of atende reunion. E situacion di Aruba Airlines tambe tin solucion sin cu e ta causa un problema pa Aruba.
Nos no por laga Aruba Airlines sangra muri. E ta un aerolinea di Aruba cu ta nifica hopi pa nos mercado y e trafico aereo entre e islanan ABC. E trafico entre Venezuela, Aruba y sigui pa Merca ta di suma importancia pa salba e compania. Pa esaki tambe tin un propocision presenta na gobierno. Ta sinti cu e siman aki gobierno lo tuma e decision corecto pa evita cu tatanan di famia ta perde nan pan. E decision di gobierno basa riba e propocision cu tin riba mesa no lo afecta nos isla cu yegada di Venezolanonan. E propocision cu tin ta bon cla. E unico pasaheronan cu lo sali riba e avion di Aruba Airlines pa Aruba ta esnan cu paspoort Hulandes. Eseynan por keda Aruba. E control ta sosode na Venezuela prome cu nan subi avion. E demas pasaheronan cu kier sali di Venezuela pa Aruba mester tin pasashi pa sigui mesora pa Merca via Aruba pasando pre clearance.
Prome cu nan subi avion na Venezuela mester mustra un ESTA valido of Visa Mericano. Ningun di e pasaheronan aki mag keda Aruba. Nan ta sigui mesora pa Merca despues di pasa Pre Clearance. Esey ta palabracionnan cla cu mester wordo dicidi manera proponi y asina permiti pa e avionnan priva por yega pazuid y tambe Aruba Airlines por pasa via Aruba pa Merca. Den mesun rosea den e vuelo di Aruba pa Venezuela, por manda segun e cuponan habri e ilegalnan cu mester bay bek. E speransa ta pa e siman aki gobierno duna e aprobacion y mesora e vuelonan pa airport priva y di Aruba Airlines cuminsa bek entre Venezuela cu Aruba. Esaki no ta pa otro vuelonan. E ta solamente pa e dos situacionnan aki bou palabracionnan estricto. Tur hende tin e pensamento cu e frontera mester keda cera pa tur otro situacion tanto aereo como maritimo. Y esey lo keda asina tambe. E decision corecto di gobierno e siman aki lo bira un alivio pa e trahadonan cu ta preocupa cu nan pan cu ta na peliger awor aki.
