Un decision di gobierno cu tin Camara di Comercio masha preocupa ta esun caminda cada director, cu na mesun momento ta accionista di un compania, mester paga su mes un salario cu a calcula na 4.166 florin pa luna. Gobierno a tuma e decision aki argumentando cu e suma aki bo mester cobra como director, mientras cu e realidad ta cu tur e tempo di Covid y hopi biaha ora cos ta bay malo, un doño di negoshi ta paga su trahado prome y su salario ta baha of ta e ultimo pa wordo paga.
Mr. Kock: “Si bo tin un negoshi chikito, y hopi hende na Aruba tin negoshi chikito, y bo tin un entrada di 6 mil florin, e ora ey mita di e entrada ta 3 mil florin, abo tin cu paga bo mes salario na 3 mil. Pero ora bo paga un salaris, bo tin cu paga premie, dus e ta hopi mas cu e 3 mil. Cu e resto di entrada bo tin cu paga bo coriente, awa. Nos tur sa cu e no ta bay yega.” Camara di Comercio sa cu pa bo por tin un salario asina, bo negoshi mester ta bayendo hopi bon pa bo por carga e peso aki.
Realidad ta cu 70% di negoshi na Aruba ta chikito/mediano (entre 3 pa 5 trahado). Si bo mester paga bo mes un salario di 4.166 florin, chens ta grandi cu mester bay corta otro caminda. Camara di Comercio tin hopi pregunta rond di e decision aki di gobierno, pero basa riba loke sa te aworaki, no ta kere cu e ta un bon plan.
E parti mas straño pa Camara di Comercio, ta cu mientras gobierno kier hiba un tipo di maneho den DIMP, na SVb ta hiba un maneho caba cu ta completamente contrario. Mr. Kock a splica cu aña pasa SVb a dicidi cu for di januari director/accionista y su casa no ta cay mas bou di SVb. Fuera di e aspectonan di ora cu e doño bira malo e mester haya su pago y kico ta pasa cu tur loke a paga te aworaki, Camara di Comercio ta argumenta cu e ponencia ta completamente fout pasobra segun ley y den e splicacion di ley ta para cu mester respeta e acuerdo laboral.
