E aumento di BBO/BAZV cada biaha ta mas cerca, specialmente despues cu Gabinete Wever-Croes a confirma na CAFT den e asina yama financieel economisch memorandum 2018-2021. E documento aki a wordo manda pa a colegio di supervicion financiero for di luna di februari caba, despues cu e colegio a ricibi e presupuesto 2018 caba. Mientrastanto e colegio di supervision financiero a reacciona riba e pakete completo aki.
Ainda no ta conoci con e coalicion di POR-RED y MEP lo atende cu e recomendacionnan cu e Colegio di Supervision Financiero a duna Gobierno.
For di nos fuentenan nos ta compronde cu e conseho riba e presupuesto ta mixto. Di un banda ta reconoce cu e Gobierno aki ta tumando medidanan pa atende cu e buraco financiero di e aña aki. Di otro banda ta nota cu tur e esfuerzonan no ta suficiente pa logra e normanan cu a wordo palabra entre Aruba y Hulanda. Es mas e debe di Pais Aruba lo subi riba 90% di e economia si sigui asina.
E conseho aki di CAFT lo wordo publica riba nan website dentro di poco. Ta importante pa menciona cu tur e plannan aki por cambia ya cu e presupuesto lo mester pasa Raad van Advies cu lo duna su conseho, pa despues di e reaccion di Gobierno di Aruba e bay Parlamento.
Cu un coalicion di 3 partido, ainda no ta conoci si tur Parlamentario ta riba un liña. Ni con Gobierno di Reino lo reacciona riba e conseho di CAFT y e hecho cu ni cu e medidanan anuncia lo logra e normanan palabra.
