E habitantenan di e area di Tanki Leendert, den vecindario di Colegio Ora Ubao, ta cansa y harta di un situacion cu nan tin ta biba pa algun aña caba,
Dos container bandona a bira practicamente un centro di atencion negativo. Tin cos menos bunita cu ta pasa diariamente. Fo’i ora tempran di mainta te cu anochi laat, caminda cu tin diferente actividad den ora di anochi, sin luz den e area y e habitantenan ta preocupa y kier un solucion pronto p’e situacion mirando cu e ta keda cerca di un scol basico na Tanki Leendert.
Diana Velasquez, un di e habitantenan afecta a conta kico t’e situacion y kico nan ta biba tur dia den e bario.
E ta splica cu loke el a indica ta un motivacion p’e minister y henter e gabinete concerni pa yuda cu e situacion cu ta basta dificil actualmente. Nan ta pasando un momento basta delicado. Velasquez ta representa tur e habitantenan di e zona en cuestion, pasobra nan tin un scol dilanti y esaki no ta un bon bista ora cu e muchanan sali fo’i scol pa bin warda nan mayornan na banda pazuid. Banda pazuid tin un veld cu por bira un luga hopi bunita y agradabel unda cu e muchanan por hunga bala y haci hopi otro cos positivo.
Sinembargo e luga a bira un caos. Ta pidi tur minister concerni, en particular prome minister Evelyn Wever-Croes pa busca un solucion.
Dia 17 di augustus scol ta cuminsa y ta hopi bon pa bin y mira un bista completamente diferente na loke nan a laga den pasado.
E SITUACION
Segun Velasquez tin hopi scuridad n’e zona ey. Ningun hende no por bay haci un deporte, cana mainta, cana atardi of anochi.
Tambe tin e zona aki cu tabata un veld di futbol, pero actualmente tin cuater caminda ta pasa riba dje. Tur hende ta bay bin y ningun mucha por hunga of haci un deporte.
Velasquez ta hopi enfatico n’e calidad di bida y locual e muchanan por haci den e sector aki, ya cu tin un scol dilanti.
Esey t’e caso realmente, segun Velasquez. E ta hopi contento si por logra algo di un manera positivo di parti di gobierno.
Fuera di esey, Velasquez a indica cu hopi hende sa loke a sosode den pasado den un di e luganan aki, unda cu nan a yega di haya un hende cu nan a haya sin bida y mas cos negativo cu ta pasa eynan den e sector.
SUSHEDAD
Velasquez a bisa tambe e luga ta un poco sushi. Tur hende ta bay tira sushi eynan. Esey t’e parti mas desagradabel p’e muchanan mira.
TERENO PUBLICO OF PRIVA
Velasquez a indica cu e no sa si e tereno aki ta uno publico of priva. Loke si e sa y ta di acuerdo cu e demas residentenan, cu nan ta desea p’e luga aki bira uno limpi, bunita y trankilo, pa tur e muchanan di scol logra sali y haci algun actividad dilanti scol mes.
BIRANDO UN MINIDUMP
E luga ta birando un minidump, desafortunadamente. Velasquez a bisa cu esey t’e situacion actual. Hopi hende di e sector ta basta desapunta cu esaki.
YAMADA
E containernan ta habri rib’e tereno. Velasquez a manda un mensahe p’e ministernan, pa nan busca un solucion. “E ta facil. Dicon no.” Nan a pidi ayudo hopi biaha p’esey. Kico t’e motibo pe no bira un solucion mas lihe. E muchanan t’e futuro di nos isla y tur cos ta basa rib’e muchanan cu ta bay scol ey banda.
Esey t’e futuro di nos isla, Velasquez a remarca. Kico nan ta aprecia y mira tur dia. Sushi, un luga desagradabel y e habitantenan mes no ta solamente e muchanan. E luga mester di luz, etc.
CONTACTO
Esunnan concerni por tuma contacto cu Diana Velasquez riba su pagina di Facebook, unda cu el a publica un video riba e tereno. Esaki sigur a hala atencion cerca e usuarionan di e medio aki.
