Diasabra a habri como un dia scur pa turismo. Na waf di Playa, cerca di Paddock, awa sushi preto a bin laira y tabata core tur riba caminda. Un awa stinki cu ta trece cu ne un holor insoportabel. Ramon Garcia ta un embahador di turismo, durante un entrevista cu 24ora.com el a conta cu e kioskonan tin algun tempo ta sufri caba relaciona cu e problema di riolering.
Mirando cu nan tin tanto tempo ta sufri di e situacion aki, ta parce cu tin cu escala nan accion. Garcia ta di opinion cu: “Wie niet wil horen moet voelen”. E ta sinti cu tin cu simplemente cambia e ruta di e riolering, bora y mand’e lama y djey ta mira con gobierno y DOW lo trece solucion mesora. E situacion aki ta un berguensa pa nos pais. Awo cu high season ta bay cuminsa, ta netamente un crisis con e turistanan cu ta paga hopi placa pa bin nos isla y ta haya nan confronta cu tin cu cana den awa di pupu cu un holor insoportabel.
E situacion no ta algo nobo, nan tin como tres aña cu e problema. For di ora cu DOW a cambia e ruta di tuberia y conect’e riba un solo tubo, cos a cuminsa bay robes. E negoshinan den cercania casi no por biba mas cu e situacion. DOW como “arte de magia” a cambia dos tuberia y conect’e na un solo y e no ta wanta e presion.
John Boomkamp t’un traha den turismo y ta preocupa pa e situacion. E awa ta keda para riba caya unda e turistanan ta cana. E awa ta bin laira den bar y baño. A tuma contacto cu director di DOW, Marlon Croes na diferente ocasion p’asina informa di e situacion pa wak con por yega na un solucion pero te cu awa ningun contesta. “Het stinkt als een beer”, asina John Boomkamp a termina bisando.
