Aunke den pasado a critica e proceso di “hedging” di WEB Aruba NV, siman pasa Gobierno di Aruba como doño di Utilities Aruba NV, a aproba pa ordena WEB pa “hedge” prijs di combustibel cu nan ta uza pa produci awa y coriente pa 12 luna largo. E acuerdo ta drenta na vigor desde dia 1 di januari te cu 31 di december 2019. E ta encera “hedging” di no menos cu 95% di tur e combustibel cu e compania ta uza den produccion di awa y coriente.
Pa colmo, Gabinete Wever-Croes a hedge na e mesun dos banconan unda semper Gabinete Mike Eman tambe a hedge. Ta trata aki di Macquarie Bank y City Bank. Cada entidad financiero a hedge un otro pida pero na final e sigura e tarifa na un average di 58 dollar pa bari.
Gabinete Wever-Croes a tuma mando na november 2017 y na december caba mester a tuma decision si ta hedge prijs di combustibel of no. Nan a aproba pero pa 3 luna so, locual sin duda no ta yuda baha e prijs mucho. Desde dia 1 di april te cu 31 di december 2018 no a sigura e tarifa, pa cual WEB a core den perdida pa algun luna, dor di e decision di Gobierno pa no hisa tarifa y ni tampoco pa hedge e tarifa di combustibel.
E biaha aki si, na vispera di un posibel aumento di prijs di awa y coriente na januari, a opta pa sigura e prijs di combustibel pa un periodo hopi mas largo, pues pa 1 aña. Cu esey lo no anticipa ningun aumento den prijs di awa y coriente, debi cu e tarifa ta sigura.
Mester tene cuenta semper cu “hedging” ta un “gamble” pasobra si prijsnan subi, e ta cumbini Aruba pasobra nos tarifanan lo keda intacto. Pero si e prijsnan baha, nos lo paga un tarifa mas halto cu mercado internacional pasobra nos a sigura e tarifa pa 12 luna continuo.
Tocante Macquarie Bank
Macquarie Group Limited ta estableci na Australia desde aña 1969. E ta un compania di inversion y servicionan financiero multinacional. E tin mas di 14.000 empleado den 25 pais y ta e infrastructure asset manager mas grandi di mundo.
Tocante City Bank
City Bank ta funda desde aña 1812 como City Bank of New York. E ta un subsidiario di Citygroup. E banco tin 2649 sucursal den 19 pais, incluyendo 723 sucursal den Merca mes y 1494 sucursal na Mexico. E sucursalnan den Merca ta concentra na New York City, Chicago, Los Angeles, San Francisco, Washington D.C. y Miami. E demas sucursalnan ta parti entre Polonia, Rusia, Pakistan, India y United Arab Emirates.
