Riba indicacion di e Centro di Rescate y Coordinacion (RCC) di Kustwacht CARIB, diadomingo atardi, den careda di 6’or, un go-fast den cercania di Corsou a wordo intercepta pa un Metal Shark.
E Go-fast, cu tabata mas of menos 30 kilometer leu di e costa, a purba di huy ora nan a tuma nota di e Metal Shark, mientras cu e personanan a bordo tabata purba di benta algun pakete den lama.
A tira tironan di advertencia pa forsa e go-fast pa e stop. Finalmente despues di un persecucion di e embarcacion, aplicando desabling fire, e go-fast a wordo para.
E Metal Shark a piki tur e paketenan for di lama. A bordo di e go-fast a detene 5 persona.
Tanto e personanan, como e pakete a wordo baha na tera na e punto di sosten di Kustwacht na Parera. E sospechosonan y e paketenan, posiblemente droga, a wordo entrega na Cuerpo Policial di Corsou pa mas investigacion.
