Despues di e Cumbre cu gremionan sindical y comercial diaranson, riba e condicionnan di Hulanda pa sigui, sindicato di trahadonan den sector di cuido ABV su presidente Gina Maduro a bisa cu “Aruba ta kedando sin rosea”, manera e documento financiero traha door di Departamento di Finanza ta titula (Rosea).
Den e Cumbre cu a bay via di Zoom Meeting, segun Gina Maduro a splica, a mustra e situacion di Aruba cu tabatin pronostico un surplus di mas cu 40 miyon florin cu a cambia pa un deficit inmenso di riba 1 biyon florin a causa di e crisis di coronavirus . Esaki a habri wowo di hopi hende riba e problema serio cu Aruba ta confrontando.
Tambe a bini dilanti cu mucho opcion Aruba no tin na e momentonan aki y “no tin mucho rosea mas”, e sindicalista a trece dilanti. Tur esaki ta haci cu mester tuma un decision hopi lihe di e caminda cu ta bay tuma. Pa cu esaki tanto gremio sindical como comercial a trece nan observacionnan durante e Cumbre, pero kico mester bay haci of e decision cu mester tuma ta den man di Parlamento y Gobierno. “ABV tin su opinion pero ta keda na nan di kico mester haci.”
A tuma nota tambe di e proposicion pa cambio di edad di pensioen. Esaki Maduro a bisa cu nan a keda cu hopi pregunta, pasobra no a splica con ta yega na esaki, e circunstancianan rond di e momento cu e persona ta baha cu pensioen no ta conoci. Por ehempel kico ta haci pa mantene e trahado saludabel y motiva pa e por keda traha bon te cu su edad di pensioen. Den esaki e condicion mental y fisico ta importante. Na Hulanda, el a señala, e trabou full time ta 36 ora pa siman, mientras cu na Aruba e ta 40 ora of mas. Na final Prome Minister a bisa nan cu lo mester bay haci un estudio prome riba e tema aki via di dialogo cu tur e instancianan concerni.
