Ta algun dia caba, probechando ausencia di Minister drs. Marisol Lopez-Tromp, tin un presion enorme for di Conseho di Minister y for di e fraccion di MEP den Parlamento, pa haci un cambio den directiva di Departamento di Infrastructura y Planificacion (DIP) cu desde algun aña ta bou direccion di Haime Croes. “Pa colmo, e nombracion a tuma luga bou maneho di Minister Otmar Oduber”, asina Melvin Tromp, vocero di Fraccion di AVP den Parlamento a duna di conoce awe.
Kico ta e problema, of e motibo dicon mester bin un cambio, no ta conoci. Ta dunando e indicacion cu ora un director ta corecto, ta para pa integridad, cu mesora e guillotina ta colga riba nan cabes, cla pa sacrifica na cualkier momento. “Den e caso aki, Haime Croes a descubri un cantidad di nombracionnan contra regla, a topa cu fraude, cu corupcion den gran escala, a suspende henter un departamento cu ta corumpi y ta pone e integridad di henter e departamento na prueba … y awo parce cu e mes tin cu defende su decisionnan dilanti e politiconan di MEP y POR. Pa colmo no e minister na kende e mester responde y duna cuenta, sino na otronan cu no tin nada di haber cu maneho di infrastructura”, di acuerdo cu Melvin Tromp.
Ta mas cu obvio cu e mesun persona cu ta rabia cu e movecionnan y investigacionnan den DIP, ta moviendo shelo y tera awo den MEP, pa via nan purba cambia e director pa asina por suavisa e investigacion penal andando. Den esey ta mencionando nomber di ex parlamentario pa MEP, ing. Robert Maduro, como e candidato pa tuma e departamento over. E ultimo aki tin hopi aña di experiencia trahando eyden, hasta prome y despues di su envolvimento den politica.
Robert Maduro tabata Parlamentario di MEP den tempo di Edwin Jacobs. E parce di lo tabatin un bon futuro den politica, te ora cu el a haya su mes envolvi den un accidente di auto, siendo burachi y a purba sigui core. E cobertura cu a duna e suceso a haci cu el a bira dificil pa MEP bend’e politicamente y asina su carera a caba den e siguiente eleccion. El a bay den silencio y a sigui su carera profesional den DIP leu di politica.
Pero ta parce cu si e mes no busca politica, cu politica mes lo busk’e. Ata awo su nomber ta menciona den gangnan di Parlamento como e candidato di MEP pa bira director di DIP, sin cu ta buscando un. “Ta dificil nombra dos persona den e mesun puesto”, asina Melvin Tromp a corda Minister Presidente Evelyn Wever, cu ta sinta cu e cartera di infrastructura awo temporalmente. “E reto probablemente ta cu MEP kier tuma e cartera di infrastructura over pero lo no kier un hende eynan nombra pa POR. Of kisas pa complace e sed di vangansa awo di Otmar Oduber, ta hala Croes un banda y pone Maduro na su luga”.
Parce cu pa otro siman Marisol Lopez lo ta bek na Aruba, pues lo bira masha interesante con ta continua awo cu e trabounan diario. El a bisa den Parlamento cu Conseho di Minister no por cambia su cartera sin mas y Parlamento ainda no a tuma un decision. Pues legalmente e ta keda den su mesun funcion, te ora Parlamento dicidi otro. Y adelantando su yegada kier cuminsa torno den su ministerio, move e directornan, locual sin duda lo causa problema interno den coalicion y den gobierno.
Hecho ta cu tin un di dos buelta di e reunion pa continua, den cual lo tin varios asunto ainda pa bin dilanti y mira luz di dia. No por descarta cu den e reunion ey, lo bin mas asunto cu kisas no ta relaciona unicamente cu corupcion den POR pero den partido MEP mes tambe. Ta parce cu e reunion aki ta inevitabel awo, cu speransa cu mas puito lo sali afo…hasta prome cu cuminsa cu e wega di “bula nan cabes” di e directornan prominente cu tin tur e pruebanan di fraude y corupcion cu tereno di pueblo!
