Mescos cu den MEP, den partido AVP tambe ta dos candidato so a bay dilanti. Tur lo demas, cu tabata riba lista caba, a haya un “onvoldoende” for di pueblo votado. E dosnan cu a “bay over” ta Gerlien Croes cu a crece cu 937 voto y Robert Candelaria cu a bay dilanti cu 340 voto. Tur otro, incluyendo e lider, a bay atras den voto, como un forma di protesta pa e forma di hiba oposicion.
Esun cu a bay mas atras, pa motibonan obvio, ta Benny Sevinger. El a bay atras cu 1171 voto, mientras cu su tras ta sigui Mike Eman cu a cay cu 1154 voto, despues Mike de Meza, Arthur Dowers, Eduard Vos y Melvin Tromp, den e lista di esunnan cu mas a cay.
Den partido AVP, esun cu a haya menos voto tabata Abigael Arends, candidata # 27 cu no a logra mas cu 37 voto individual. Un persona conoci riba red social pero cu no a logra convence publico pa vota p’e. Esaki kisas un les pa lidernan, cu famoso no necesariamente ta traduci den voto.
Cu e realidad aki awo riba mesa, directiva di partido tin un trabou pisa pa haci, den cuadro di rehubenece y cambia e partido. Cu den oposicion, memey di pandemia y gobierno no popular, ainda no por crece…e ora e problema ta den partido mes! Pueblo ta spera un oposicion mas pisa contra gobierno, si ta cu lo bay den oposicion awo.
E lista tabatin basta cara nobo, pero e caranan no ta halado di voto. A haci algun eror atrobe, tipo Michael Lampe na 2017. A duna algun hende number halto, siendo cu kisas nan por ta hopi sabi, pero no ta hala voto aden pa partido. Di otro banda, un hoben manera Wendrick Cicilia, a pone te number 18 y a haya 482 voto! Pa hoben cu e ta, el a haya hopi mas voto cu Rycond Santos do Nascimento, Selene Kock, Clifford Heyliger, Marlon Sneek, Sharon Erasmus, Melvin Tromp, Carlos Bermudez, Desiree Croes y mas!
Tocante Partido AVP
J.H.A. “Henny” Eman a funda “Arubaanse Volks Partij” (AVP) na aña 1942. Ideologia di AVP ta regional, democrata Cristian & conservatismo. Lidernan desde fundacion tabata J.H.A. “Henny” Eman (welo), Cornelis A. “Shon A” Eman, Dominico Guzman Croes, Rudy Frank, Chibi Croes, J.H.A. “Henny” Eman, Robertico “Tico” Croes y M.G. “Mike” Eman. Na tur a participa den 28 eleccion. Record maximo di voto: 33,103 (2013) y Record minimo di voto: 1209 (1977). Den eleccion na September 2017 e partido a logra 23,376, manteniendo su mes como e partido mas grandi di Aruba, pero bayendo atras di 13 pa 9 asiento. Pero e tendencia di caida a sigui y den eleccion siman pasa a logra 18.335 voto, un caida di 5.041 voto, bon pa solamente 6 asiento y 1 restzetel.
