E votadonan di MEP a manda un mensahe cla pa e partido, e lista ta zwak, e candidatonan no a traha suficiente of no a convence e votadonan, pero si ta kere den e lider! Evelyn Wever a bay hopi dilanti, mas di 110% den un eleccion, cu ta un logro grandi pa un partido na mando y den pandemia! Ta obvio cu comunidad a aprecia su trabou den e pandemia y e forma con el a dirigi e pais. No solamente e lider, sino e unico otro candidato cu a crece ta Endy Croes, aunke ta cu 156 voto. Pero por lo menos el a crece, pasobra e demas a competi cu otro den caida!
Den e lucha ey, Xiomara Maduro ta na cabes, como esun cu mas a cay den voto. Probablemente comunidad a ripara cu, de facto, ta Evelyn Wever tabata maneha finansa di nos pais. Na caminda e sindicatonan no tabata sinta mas cu Maduro sino tabata bay direct na Wever. Ta acus’e di ta chat na celular henter reunion y no ta domina e materia di finansa publico den ningun sentido. Pueblo no a vota pa Nilo Swaen, cu ta esun cu tabata “get the job done”, pues a castiga Maduro pa esaki.
E di dos cu a perde mas voto ta Glenbert Croes, cu tampoco no tabata mucho visibel den e ultimo cuater añanan. E hecho cu e no tabatin un bon relacionista publico, a pone cu e tiki cu el a traha, tabata keda scondi pa publico.
E di tres gran perdedo a resulta dr. Arthur Vallejo. El a hiba un bon campaña na 2017 y a priminti di adapta e maneho di gobierno pa cu dokternan cu a studia den e region. Gobierno a bin te bay y nada di e areglo pa e hobennan cu a studia medicina na Colombia, Costa Rica, Cuba, etc. Tambe a tene cuenta cu el a bay traha den su praktijk tur e tempo y tabata ausente di politica. Awo den eleccion el a aparece atrobe pero no a convence su votadonan mas.
E di cuater candidato cu a bay mas atras den MEP tabata Dangui Oduber, a pesar di a core un campaña miyonario cu hopi propaganda, borchi, pechi, bril y hasta un revista moderno cu a parti di cas pa cas. E ta un di e ministernan cu a emplea mas hende ultimo, specialmente na DVG, pero toch no a yud’e den voto. E mes a pensa cu e lo saca mas voto cu e lider mes, pero na su luga el a bay atras.
E siguientenan cu a cay den MEP ta Ady Thijsen y Rocco Tjon. Net e dosnan cu a purba changa Hulanda den un ley cu awe a hinca Aruba den un RFT en bes di CFT. Riba dje Thijsen a opta pa bay Hulanda algun dia prome cu eleccion lagando campaña atras. Tjon, separa di a perde tur e polisnan cu e no por a yuda debi cu e no a haya e cartera di husticia, ta bin acerca cu e declaracion di Paola Goede net den siman di eleccion a caba di kibra e politico.
Pa loke ta trata Endy Croes, e hecho di tabata den prensa regularmente obviamente a yud’e. Su pasado, kita for di trabao na Lotto pa Deporte pa mal maneho y di a enrikece su mes y su famia, no tabatin efecto mas riba dje. Kisas door cu a haci Lotto “Endy-proof”, a pone cu e no por a yega na e cah’i placa di Lotto. Con cu bo bir’e, t’e so a crece den voto despues di Evelyn Wever-Croes, pues algo el a haci bon.
Evelyna Christina “Evelyn” Wever-Croes, como lider den eleccion na aña 2013 a logra 3396 voto individual, mientras den e ultimo eleccion na September 2017, aunke e partido a bay dilanti cu 2 asiento, toch e votonan individual no a aumenta tanto, pero tabata bon pa 3503 voto riba nomber di Evelyn Wever, cu ta representa un aumento di 3.15%. Den eleccion di siman pasa, Evelyn Wever-Croes a alcansa 7518 voto individual, un aumento di mas cu 110%!
Tocante Partido MEP
Gilberto F. “Betico” Croes a funda Movimiento Electoral di Pueblo (M.E.P) dia 9 di Februari 1971. Nan ideologia ta social democrata. Lidernan desde su fundacion tabata Gilberto F. “Betico” Croes, Nelson Oduber y Evelyne Wever-Croes. A participa 17 biaha den eleccion. Record maximo di voto: 25,172 (2001) y record minimo di voto: 8095 (1973). Den e eleccion na September 2017, Partido MEP a logra 22,061, bon pa 9 asiento den Parlamento. Den eleccion di siman pasa, partido MEP a logra 20.700 voto cu ta bon pa 7 asiento mas 2 restzetel pa yega 9 asiento.
