Nos a drenta e di nuebe luna cu mr. Juan “Ady” Thijsen ta na Hulanda den funcion di Minister Plenipotenciario Suplente, pero ainda no tin fin di huramenta pa haci su nombracion oficial. No ta conoci si e biaha aki si el a logra pasa screening pa bira minister, pasobra na aña 2017 e resultado tabata negativo. Entretanto e ta representando nos isla na Hulanda den reunionnan importante, sin cu ainda e ta den funcion oficial.
Ady Thijsen a presencia, riba invitacion di Stichting Indië Monument, e conmemoracion nacional na Roermond. Durante e ceremonia na e Nationaal Indië-monument 1945-1962 a conmemora tur e militarnan cu a fayece entre aña 1945 te cu 1962 na Nederlands Indië, e actual Indonesia. Tambe a conmemora tur militar cu a fayece durante di misionnan di paz di Nacionnan Uni.
E ceremonia a conta cu presencia di Prome Minister di Hulanda, Mark Rutte, vice-presidente di Tweede Martin Bosma, presidente di Eerste Kamer, Jan Anthonie Bruin, Comisario di Rey pa Limburg Emile Roemer y otro dignatarionan Hulandes.
Premier Rutte a tene un discurso y a pone un krans den nomber di Conseho di Minister na e monumento. Despues diferente representante, tanto militar como civil, a pone un krans na e monumento, sigui pa un desfile dilanti di e invitadonan, autoridadnan militarnan y civil y bishitantenan.