Na Wayaca tabata tin un protesta contra matamento di bestia. No ta contra di e killcage, pero si e forma con e bestianan ta wordo mata. Ayera, DVG tabata tin un conferencia di prensa. Manera ya caba ta conoci, nan a anuncia cu lo bay tin un tipo di demostracion. Ya tin contacto cu Gobieron y awe berdad, den un grupo, tur hende tabata para eynan pa mustra nan preocupacion den e forma di elimina bestia. Nan tambe ta busca un manera pa e problema aki wordo soluciona den un otro forma.

Geraldine Kock, ta un di e voceronan for di Wayaca, voluntario di Crioyo Trappers. Nan a bay eynan pa nan mustra nan mal contento con e cacho y pushinan ta wordo mata. Den ningun momento kier pa e killcage bay, sino cu nan kier e forma, manera nan ta wordo mata, pa nan cambia esey. Door di esey a acerca minister tambe y a dun’e un plan cu lo e bay studia y a keda di contact e gruponan aki bek.

 

E plan

Regla internacional ta bisa cu solamente un veterinario por pone un cacho drumi. Aki na Aruba, e cabayero cu ta haci’e, ta certifica of ta un veterinario pa haci’e. Pasobra na Merca y na Europa, ta solamente ta un veterinario ta hacie. Tambe nan ta uza dos hangua. Aki nan ta uza solamente e ultimo hangua pa mata e bestia, cual no ta corecto. Tambe e mester tin dos persona. Aki ta solamente un persona ta bin haci’e, cu no por. E ta logico si pensa, con un persona por mata tanto cacho den paar di minuut of ora y su so. Si e tin cierto cosnan den su man, cu e no ta maltrata e bestia.

 

Bestianan riba caya

Prome cos cu ta pensa pa soluciona, ta pa sterilisa e bestia, sea ta cacho of pushi, sea cacho ta homber of muhe. Nos Arubianonan tin e mentalidad cu solamente ta sterilisa e cacho muhe of e pushi muhe. Pero no ta asina. E macho tambe mester wordo sterilisa. Tambe educacion ta un punto. Ultimamente nos ta mira cu nos mesun hendenan ta venena nos bestianan. Ta siña e muchanan pa dal e bestia un scop. Na scol mester cuminsa bek cu un tema di no solamente bestia, pero di nos medio ambiente pa cuid’e. Tambe polis. Loke ta pasa ta cu nos tin e ley di plataforma di cacho, pero lamentablemente no tin suficiente polis pa ora cu nan yama, pa bin yuda pa e diferente casonan. Ta diferente instancia mester wordo cambia. Tambe na Veterinaire Dienst. Algo mester wordo haci. Na scol, educacion mester bin cambio den dje. Den polis, nan mester bay busca mas polis cu ta dirigi riba e tema di bestia, maltrato, etc. y por duna boet tambe. Por ultimo, como ciudadano, nos mester concientisa cu nos mester stop. Crioyo Trappers, tin su voluntarionan y nan tin nan trabao mes. Ta jammer cu tin biaha tin cu bay saca cacho cu a sterilisa, cu ta pasa chip, ta pasa scanner y ta tira den killcage. Kock a splica cu awe pa casualidad tabata henter dia eynan. Un meneer a trece un cacho cu tabata di e bisiña. A puntre dicon, y el a splica cu e ta mata e galiñanan di dje. Na fin di dia, a scapa e cacho.

 

Peso financiero

E voluntarionan di fundacion Nisi Cannis, ta biba riba donacion. E donacionnan ta bin mas parti di e turistanan, e Mericanonan, e Hulandesnan. Lamentablemente, nos mesun Arubianonan no gusta saca placa pa nos mesun bestianan. Te awor aki tin un aña y mey cu nan ta existi. Nan ta biba riba donacion di tur loke e hendenan ta duna.

 

Cuanto tempo lo dura

Kock a splica cu nan a pone cinco aña pa yega unda nan kier yega. Cu tereno grandi, cambio aki na Aruba mes, educacion na scol, polis, e hendenan tambe, etc. Aplica e ley manera debe ser di cacho, pa proteccion. Nan ta kere cu si. Compara cu antes, a haya cifra, cu e tabata mas halto. Awor aki Veterinaire Dienst mes a bisa, e cantidad di bestia cu ta wordo poni drumi a baha. Crioyo Trapper y otro fundacionnan tambe ta sterilisa y ta trahando duro. Nan tabata tin dos Animal Balance y despues tabata tin United Dogs of Aruba. E Arubiano mester concientisa cu si bo ta bay tuma un cacho, e ta dushi djis pa un rato. Un cacho ta pa 15 te cu 17 aña. Si bo sa cu bo busca un cacho, e bira malo, ta hibe killcage. E ora nan ta bolbe tuma un puppy bek, y esey no por.