Dilanti Giselle Department Store boluntarionan a organisa un Food Drive “Yuda nos Yuda nan”, unda cu nan a bini hunto pa warda riba esnan cu a yega cu comestibel pa por yuda otronan cu no tin cuminda.
Lisette Gomez, di fundacion Mi voz ta Bo voz, a bisa cu e tur cos a bay bon y tabata ricibi hopi producto. Desde trempan cu nan a yega pa setup, a bin topa cu un rij largo di persona cu a bin busca cuminda, pero e informacion tabata robes. A splica nan cu por registra y aki tin un bista cu tin hopi necesidad eyfo. P’esey a pidi comunidad pa yuda sea cu un bleki, saco di aros, pasobra nan a ricibi bastante auto. E boluntarionan ta tuma e productonan, haci nan limpi y di biaha ta separa nan den un crate, unda cu probablemente pa diaranson lo cuminsa reparti caba.
E fundacion tabata tuma tur tipo di producto, desde frozen pasobra tin caminda di warda manera caha di galiña, spare ribs. Tambe a ricibi pan fresco di un señora cu ta traha, incluso ta acepta cosnan di higiena manera shampoo, pasta di djente, desedorante. Cu tur esaki por traha un bon pakete. Tin formulario di inscripcion, pasobra ta haci control y no lo bay ta asina streng pa tarda. E necesidad ta grandi.
Tin hende a yega cerca nan y bisa cu nan no a come, segun Gomez. Cos ki ta algo grave, pasobra tin cu a perde trabou of aplicacion pa FASE no a bay manera mester ta. E fundacion t’ey pa asina yuda e hendenan aki pa comunidad por steun otro y pa no pasa hamber.
Despues di tur loke a ricibi, lo traha paketenan y sea diamars of diaranson lo cuminsa. Tin team di boluntario extra cu a pone autonan disponibel. A traha riba un lista caba, yena adres di tur persona cu a aplica online. E fundacion a ricibi yamada di hendenan grandi cu no por yena e formulario y ta presenta cerca nan. Lo avisa e persona cu e lo ricibi su pakete.
Segun schedule e boluntarionan lo tabata dilanti Giselle Department Store te cu 6:00PM, pero esnan cu no por a pasa laga algo, por haci esaki den trascurso di siman. E fundacion tin registra mas di 100 persona, segun Gomez.
