Sindicato FTA un tempo tabata representa trahadonan di Alhambra Casino, kendenan despues a dicidi di bay purba suerte cu sindicato STA. E aña’ki, of recientemente, poco-poco e trahadonan a cuminsa yega bek cerca FTA pidiendo pa representa nan interesnan den negociacion pa CAO. Pronto ta bay tin un referendum na e casino aki, pidi door di FTA, pa logra haya e derecho pa papia den nomber di empleadonan di Alhambra Casino.
Hubert Dirksz, presidente di FTA a bisa asina cu e trahadonan a bira miembro bek di FTA, a pidi un referendum. No tin drecha ainda poni pa e referendum tuma luga.
FTA ta den e proceso pa regla e procedura. Nan mester haya informacion ya cu por ehempel, aworaki nan no ta na altura di cuanto hende ta trahando den e casino. Nan tin un lista pero e ta bieu y tin persona cu no ta traha eynan mas. Awo mester bay analisa e sitio pa mira si ta tuma e casino completo of ta bay haci pa departamento separa.
E empleadonan conoce trabou cu FTA a yega di haci pa nan den pasado y a logra semper adelanto pa nan, sea den salario of indirectamente den beneficionan. Y sempero a representa nan den Corte. E no sa kico tabata e problema cu e otro sindicato, pero di parti di FTA por sigura cu semper a duna un bon servicio na su miembronan.
