Despues di mas di 7 aña di preparacion intensivo y trabou, Banco Central di Aruba (BCA) a lansa e serie nobo 2019 di placa di papel oficialmente dia 3 di juni ultimo. Di e dia ey a publica e fechanan importante pa tene cuenta cune. Un di nan ta e ultimo dia cu por paga oficialmente cu e placa di papel bieu. Esey ta dia 11 di augustus 2019, despues di e fecha ey no por paga cu e placa mas, pero por cambi’e si na banco.
E tema principal di e biyetenan aki ta “Bida na Aruba”, cu ta contene elementonan di e flora, fauna, herencia cultural, monumentonan y luganan prominente di Aruba. Banda cu e diseñonan ta hopi colorido, e biyetenan ta contene tambe e caracteristicanan di siguridad mas avansa disponibel riba mercado.
BCA ta informa cu e cronologia di e emicion di e serie nobo 2019 di e biyetenan di florin ta lo siguiente:
👉 3 di juni 2019
Emision oficial di e serie nobo 2019 di biyetenan di florin
👉 4 di juni te cu 11 di augustus 2019
Co-circulacion di e serie di 2003 y e serie nobo di 2019 di biyetenan di florin (10 siman)
👉 12 di augustus 2019
E serie 2003 di biyetenan di florin ta sali for di circulacion y no por wordo uza mas pa haci pago
👉 4 di juni te cu 4 di december 2019
Por haci e cambio di e serie di 2003 pa e serie nobo di 2019 di biyetenan di florin solamente na e banconan comercial (6 luna)
👉 5 di december 2019 te cu 12 di augustus 2049
Por haci e cambio di e serie di 2003 pa e serie nobo di 2019 di biyetenan di florin solamente na e BCA (30 aña)
‘Like’ y ‘share’ nos page “Aruba su Florin” y keda informa di nos actividadnan.
