Mama di fugitivo bek den libertad: Mi no tin nada di haber cu su huymento

“Pasobra mi ta su mama, ami ta e prome sospechoso”, asina Recherchenan a bisa Niurka Kock, mama di e fugitivo Miguel Schneiders. E ta lamenta e forma con Polis a maneha e asunto aki y a core publica su detencion prome cu nan a ni interog’e. Es mas, e ta convenci cu e solo hecho cu e ta mama no por haci hende sospechoso asina. “Mi no tabatin, mi no tin y no lo tin nada di haber cu e huymento di Miguel”, asina e mama a bisa nos den un prome reaccion despues di recobra su libertad awe tardi.

Polis a yama Niurka Kock pa e pasa pa duna un declaracion na Warda di Recherche, relaciona cu e huymento di su yiu Erick Arturo Minguel Junior Schneiders, miho conoci como “Miguel” riba diadomingo dia 14 di juli ultimo for di Warda di Polis di Santa Cruz. Sinta ta warda riba su abogado, ya e Vocero di Polis a manda informa prensa cu a detene pa complicidad. Su abogado, mr. Suzy Kock, a reclama Polisnan ora cu el a yega pasobra ni sikiera a interoga e mama, cu ya caba a informa di su detencion. Kock ta lamenta e forma aki di traha di Polis, cu mas bien ta parce di kier daña nomber di hende sin mester.

Pa loke ta e sospecho mes contra Niurka Kock, el a bisa cu Recherchenan a puntr’e si e sa mas di e huymento di su yiu. Nan tabata insinua cu sea el a yud’e of tabata complice di e huymento. El a splica Polisnan cu e diadomingo specifico ey e tabata trahando. Awe nan a verifica cu berdad e tabata trahando e dia ey y consecuentemente a lag’e den libertad.

Tocante e fugitivo:

Dia 21 di mei 2017, el a a tira un homber mata dilanti Olde Molen. Despues di 9 dia di a comete e acto, el a entrega su mes. Na februari 2018 a conden’e na 12 aña incondicional. Fiscal a exigi 14 aña pa asesinato. Awo cera den KIA, Miguel a ataca otro preso hincand‘e. E tabata deteni na Warda di Polis na Santa Cruz pa interogacion. Prome cu e asesinato, e tabata cera caba pa atraco arma. Husticia ta consider’e un preso peligroso y cu ta uza arma di candela.

Mama no sa di nada:

Niurka Kock a sigura cu aunke e ta mama di Miguel, esey no kiermen cu e sa algo di su paradero. El a bisa Polisnan cu e no tabatin, no tin y ni tampoco lo tin algo di haber cu e huymento di su yiu homber for di prizon. E ta lamenta si cu henter e sussedido aki, incluyendo su detencion inhusto, a haci un impacto grandi riba su famia. Su mama por ehempel a bira malo despues di e noticia cu a detene su yiu muhe pornada.

E ta spera cu despues di dos siman cu a transcuri, cu pronto lo por bin un solucion pa e caso aki y cu bin claridad tambe, pa evita cu Polis ta sigui cera hende inocente asina. E realidad ta cu Polis a faya lagando un preso huy den dia cla, sin cu camara di siguridad a capta e movecion, sin cu ningun Polis a nota cu un hende ta zaag porta di hero pafo, sin mira un hende ta cana bay…pero awor kier cera hendenan cu no tin nada di haber. Te awe no a tende cu a detene ni suspende ningun Polis pa e acto aki, pero si a detene dos civil pa huymento for di Warda di Polis.