Federacion di Trahadonan di Aruba (FTA) a dal e siguiente paso pa respeta derecho di su miembronan den e proceso di finalisacion di relacion di trabou.
E dianan ta aserca di e fecha anuncia door di gerencia di Citgo Aruba Refinery (CAT) pa finalisa e relacion di trabou pa 30 di januari, 2020. Un fecha cu sindicatonan no a acepta pa motibo tin hopi cos colga den aire ainda, entre otro e compensacion no ta igual cu locual e ultimo grupo a bay a ricibi. Pero tampoco nan tin clarificacion riba kende ta sigui y cu cual compania, manera leynan di Aruba ta exigi.
Despues di e accion di protesta siman pasa y cu no a logra nada na mesa cu Mediador, a dicidi di manda un carta pa PDV Holding Inc, na Presidente di e Hunta di Directornan, cu base na Texas.
Loading…
Reload document 
Open in new tab
Loading…
Den e carta nan ta repasa tur e proceso cu a bin ta tumando luga te cu e carta y contesta haya di CAT. A cuminsa pa denuncia con por lo menos un grupo a wordo informa cu CAT simplemente lo deposita e placa riba e cuenta di e empleadonan y ta considera cu e relacion di trabou ta finalisa pa dia 30 di januari awo. A splica cu CAT ta keda insisti di no por cumpli manera den pasado pa motibo di no tin e fondonan disponibel y cu nan no por haya fondo adicional for di PDV Holding.
Presidente di FTA Hubert Dirksz a bisa den e carta cu “e actitud tuma door di Citgo Aruba den e asunto aki no ta loke nos a spera for di un compania responsabel y cu ta subsidiario di un organisacion internacional di bon reputacion manera PDV Holding Inc. Apesar cu e empleadonan di CAR no ta un empleado directamente di PDV Holding Inc., no ta irrasonabel di spera un intervencion ora cu subsidiarionan ta actua manera ta e caso di CAR aworaki. E forsa laboral den cualkier pais mester wordo trata di un forma husto y di acuerdo cu e principio- y leynan laboral local. Citgo Aruba conscientemente ta violando leynan laboral di Aruba y haciendo esaki no solamente e ta faltando respet na e empleadonan pero tambe na e comunidad Arubano den su totalidad.”
Ta splica tambe loke ley ta exigi pa un doño di trabou haci, mantene su empleadonan informa di tur hecho relaciona cu e paro di operacionnan como tambe e compensacion pa su empleadonan di un forma husto pa daño cu nan ta sufri cu perdida di nan trabou, y manera cu a haci den pasado door di Citgo Aruba caba. E actitud di “my way or the highway” tuma door di CAR no por wordo hustifica di ningun manera, FTA ta bisa den e carta.
Debi na e situacion ariba describi, nan ta haci un peticion urgente na PDV pa interveni den e asunto aki y percura pa Citgo Aruba cumpli cu su obligacionnan legal, moral y financiero pa cu su empleadonan. Y pa a termino corto e partidonan sinta na mesa pa negocia un pakete di retiro rasonabel. “Nos ta spera un cooperacion completo di PDV Holding Inc., pa pone e fondonan necesario pa cubri e compensacionnan financiero menciona.”
