Pronto Aruba lo conoce su propio “Children’s Museum”

618

Aruba pronto lo ser conoci cu su propio museo pa mucha cu lo tin e nomber “Aruba Museum of Play”. Un “museo” ta conoci pa ta un lugar unda bo ta cana rond y no mag di mishi cu nada.

Un museo di mucha ta net lo contrario, muchanan ta wordo encurasha pa hunga cu tur cos pa asina aki pa medio di e hungamento nan por siña den e area di arte, humandidad y sciencia. Tur cos lo ta “hands-on” y interactivo y e muchanan lo por explora e museo na nan mesun tempo y na nan mesun manera hunto cu nan mayornan, famianan y amigonan. E muchanan por mishi, hunga, subi, kruip y expirementa den cada un di e exhibishonan cu tin den e museo.

Mas y mas, estudionan ta mustra cu experencianan educativo ta hopi importante pa e desaroyo di un mucha. Un museo pa mucha ta yuda muchanan desaroya habilidadnan fundamental, stimula nan creatividad y curiosidad y ta duna nan e gana pa siña cual nan lo hiba cu nan pa e resto di nan bida. Un museo di mucha tambe ta beneficioso pa henter e comunidad door cu esaki lo yuda na contribui na e desaroyo di e mucha y alavez e ta un caminda unda famianan por bini hunto y pasa un tempo placentero  hungando y siñando.

Pronto Aruba lo conoce su propio “Children’s Museum”

Pronto Aruba lo conoce su propio “Children’s Museum”. Click link pa mas https://24ora.news/2QVNvHE

Posted by 24ora on Tuesday, January 14, 2020

Tur cos a cuminsa ora cu co-fundador di e museo, Reuella Berg, a bai bishita un museo pa mucha na Charleston South Carolina na 2018 cu su 2 yuinan. Eynan por a mira con e muchanan a disfruta henter un mainta y alavez a siña tambe den diferente area manera arte, sciencia y humanidad, y tur esakinan den un ambiente crea specialmente pa nan. For di eynan a bin cu e idea pa por trece algo asina na Aruba pa asina aki tur e muchanan na Aruba tambe por experencia algo unico crea pa nan. Na 2019 a cuminsa cana e caminda pa wak con por hasi esaki un realidad pa Aruba y na November 2019 e fundashon “Aruba Museum of Play” a wordo funda oficialmente. E fundashon ta conta cu un directiva di 7 persona local cu ta cla y dispuesto pa traha pa por realisa e projecto aki pa tur e muchanan di Aruba. E miembronan di e directiva ta:

  • Presidente: Henk Reeberg
  • Secretaria: Zizianne Flemming
  • Tesorero: Anthony Martina
  • Miembro: Alvin Boekhoudt
  • Miembro: Naomi Werleman-Richards
  • Miembro: Kiziah Arends
  • Miembro: Reuella Berg

Awor cu e fundashon a bira oficial, directiva di e fundashon kier a informa pueblo di Aruba tocante e bunita projecto aki pa asina tur por yuda pa hasi esaki posibel. E fundashon ja caba ta forma parti di e “Association of Children’s Museum” cu actualmente tin 425 museo di mucha den 20 diferente pais y cu ta comparti nan experencia, conocemento y ta yuda otro pa por realisa mas museo di mucha den mas pais rond di mundo. Por mira mas informacion riba nan website https://www.childrensmuseums.org/

Pa por realisa e projecto aki claramente mester di fondo. Y na e manera aki e directiva di e fundashon kier a invita comerciantenan, negoshinan local y international cu ta desea di contribui y forma parti di e bunita projecto aki pa tuma contacto cu nos directamente pa asina nos por sinta cu otro pa por duna mas informashon con por partner cu nos.

Tambe nos a registra e fundashon pa  Aruba Doet, cu lo tuma lugar na maart binidero, unda nos lo inicia cu hasi limpi di e localidad. Si ta desea di yuda por registra como voluntario riba e website di  Aruba Doet.

https://www.arubadoet.com/aw/node/694

Por sigui tur e desaroyonan di Aruba Museum of Play riba e seguiente rednan social:

Facebook: www.facebook.com/arubamuseumofplay
Instagram: @arubamuseumofplay
Youtube: https://www.youtube.com/channel/UCmjSPwBCP7b7eAzzJZVcBJA?view_as=subscriber Website: www.arubamuseumofplay.org

Tambe por tuma contacto cu nos directamente na:

E-mail: [email protected]
Tel/Whatsapp: +297- 594-2419Nos ta spera di por conta cu apoyo di henter e pueblo di Aruba door di contribui na e projecto aki pa asina nos por realisa Aruba su propio museo pa mucha!