Sindicato FTA a logra haya un reunion cu Prome Minister Wever Croes pa papia riba futuro di e refineria. Aunke cu e reunion a bay bon, FTA a lamenta cu e representantenan di Refineria di Aruba (RDA) no tabata presente den dicho reunion. Esaki presidente di FTA Hubert Dirksz a bisa den un declaracion.
E encuentro tabata basta largo y a saca algun conclusion. Un di nan ta cu a pidi cu den e MOU cu ta bay firma, tratando pa haya transpaso di e refineria bek pa Aruba, pa mientras cu no tin ningun acuerdo, no manda trahadonan cas. “esaki nos ta luchando p’e y esey Gobierno ta bay percura cu lo tuma luga,” Dirksz a bisa.
Un otro punto cu e sindicato FTA ta luchando p’e ta pa FTA haya un representacion den e comision cu ta atende e procedura pa haya e refineria bek. Gobierno a priminti FTA cu ta pone un representante di e trahadonan den e comision. “E ta un bon señal pa nos y mientrastanto tur desaroyo ta keda un tiki den halto, pasobra cos no ta bay manera nos ta pensa. Tin hopi informacion, pero cu no por duna pasobra tin un proceso andando. Tin diferente paso cu mester tuma prome cu yega asina leu di bisa cu ta stop cu un punto pa sigui riba e siguiente. Pero e situacion ta mustra cu no tin probabilidad cu CITGO ta bolbe. Y mester yega na un bon opcion, esta un operador nobo,” Dirksz a bisa.
FTA lo desea pa henter e proceso aki keda cla den un tempo mas cortico posibel, pero nan ta consciente cu e ta algo cu lo tuma su tempo. P’esey a pidi pa inclui den e MOU cu e trahadonan lo no perde nan trabou. Pero mester mira un forma con ta bay cubri e gastonan.
FTA a pidi tambe cu informacionnan no ta sali sin mas for di RDA pa no crea speculacin y e ta un punto cu Gobierno tabata di acuerdo cun’e. Na final cualkier decision mester ta na beneficio di pais Aruba y di esnan cu ta trahando ainda den e refineria. Loke cu a sinti for di e reunion ta pa mantene e refineria habri, cu otro grupo, y ta loke cu FTA tambe ta desea, mirando su aporte na Aruba compara cu cualkier otro negoshi. Pero mester pone un periodo den cual tur esaki mester keda cla.
