Vice presidente Ehecutivo di Venezuela, Delcy Rodriguez, a indica cu e fronteranan entre Aruba, Boneiro y Corsou ta keda cera na un forma indefini.
Lo somete un revision di relacion diplomatica cu e paisnan aki. E gobierno di Maduro a bisa di tin e bandera historico di dignidad y tambe cu nan tin e derecho di no cumpli cu ordonan di ningun imperio segun nan constitucion.
Tur esaki ta bin pa motibo di un supuesto ayudo humanitario forsa pa Venezuela, segun e Vice presidente. E gobierno di Venezuela a dicidi di suspende tur tipo di vuelo, priva, comercial y maritimo entre Aruba, Boneiro y Corsou. Ta cera e frontera cu e islanan aki cual decision soberano di e gobierno constitucional y legitimo di Republica Bolivariano di Venezuela.
E medidanan aki di tin e frontera cera ta keda pa tempo indefini te ora cu e gobierno di Corsou no recapacita y no ta mantene na e leynan internacional y respeta e leynan internacional cu ta existi den esaki. Echo cu Corsou, un isla cu Venezuela tabata mantene relacion historico, di amistad, di bisiña, di cooperacion, di hermandad, a dicidi di fia nan mes p’e show aki cu ta percura y prentende e intervencion di Venezuela.
Door di e situacion aki Venezuela a opta pa no solamente e suspension y ceramento di frontera, pero tambe pone bou revision e relacionnan diplomatica cu e paisnan aki. Presidente Nicolas Maduro a ordena cu canciyer Jorge Arreaza lo ta encarga pa haci e revision aki. “A forsa nos door di purba di no conoce e leynan internacional,” Delcy Rodriguez a expresa. Venezuela henter mester sa cu e engaño aki pa diasabra 23 di februari ta un yamada di october 2015 cu John Kelly di Merca a haci. John Kelly, cu ta forma parti di e gobierno di Donald Trump, a bisa cu si bin un caso di ayudo humanitario na Venezuela, Merca lo interveni cu su militar.
Rodriguez a expresa cu nan comercio entre e paisnan ta wordo afecta pa motibo di e gobierno aki cu no ta respeta ningun tipo di norma. Nan no ta respeta ni relacionnan historica, comercial, economico cu ta existi den e pais. Venezuela tin inversion den e pais y p’esey como un estado Venezolano ta e deber di respalda e derecho legitimo di Venezolanonan.
E relacionnan politico lo keda bou revision, pero semper e gobierno di Nicolas Maduro ta disponibel pa un dialogo na e forma diplomatico cu ta coresponde. “Nos ta pidi pa haci esaki den un forma respeta na e gobiernonan aki cu awendia ta laga nan mes wordo manipula p’e gobierno di Donald Trump. Semper nos t’ey pa dialogo pero na e nivel di respet absoluto p’e soberania di Venezuela na e cartanan di Nacionnan Uni.” Tambe ta pidi pa respeta e derecho di auto-decision di e pueblo Venezolano.
