Den un conferencia di prensa awe mainta dilanti di parlamento, fraccion di MEP a bin pa dilanti pa vocifera cu nan ta cla pa reuni p’asina trata e presupuesto 2022. Segun Darlaine Guedez-Erasmus, miembro di fraccion MEP, lo bay trata e ministerio y e maneho di minister Rocco Tjon y Glenbert Croes.
Asina e parlamentario a bisa cu di su parti e lo bay trece un mocion pa dilanti awe relaciona cu e programacion di ‘veilige bario’s’, cu minister di asunto social ta bezig cu ne, cu ta encera iluminacion di e barionan, polis drumi, actividad pa hoben den bario, ‘na-schoolse opvang’ den bario y cu e ta aplaudi tur e iniciativa aki. Den su mocion el a inclui cu e ta haya cu grandi y chikito mester participa den e programanan aki p’asina hunto tuma responsabilidad pa nan bario y crea un comunidad fuerte.
Na su turno drs. Shailiny Tromp-Lee, a bisa cu esaki sigur ta un reunion di suma importancia den cual lo trata e ley di mas importante. A detaya cu e presupuesto a drenta dia 22 di februari ultimo, pues nan a ricibi casi 1 luna completo pa por haci pregunta por escrito dirigi na gobierno y cu su persona a haci su trabou debidamente y en total a dirigi 150 pregunta na gobierno, riba cual el a ricibi contesta debidamente.
Como parlamentario, e lo bay enfoca riba e aspecto di trankilidad y paz laboral riba nos mercado laboral y tambe e aspecto di desempleo. Tambe e lo enfatisa riba e atencion pa nos hobennan, e formacion, empoderacion y mas cu tur e problematica di desempleo bou di e grupo meta aki. Por ultimo, lo e bay adresa e topico di ilegalidad riba nos isla pa e parti di husticia
