Ex lider di partido MEP, sr Nelson Oduber tabatin uza un dicho politico den pasado cu ta bisa: “tin politico cu kier gaña muri pa mira kendenan ta bin na su entiero” y ta esaki nos a mira den ultimo dia, ora cu Minister Otmar Oduber a bin dilanti pa denuncia Gobierno di AVP, cu no haci trabou di mantencion di e seccion bieu di edificio di gobierno for di 8 aña pasa.
Fraccion di AVP ta mustra cu e declaracion di e ex Minister di Gabinete Mike Eman, mester por sa miho cu esey, ya cu ta su persona mes a yuda traha duro hunto cu boluntarionan na 2009, pa drecha e edificio historico di Gobierno bek, despues cu gobierno di su gobierno actual, MEP a bandona esaki y tabata a punto di bende e edificio aki.
A sigui mustra cu ta e actual Minister O. Oduber aki a critica y cuestiona e forma con gobierno di MEP den pasado kier a bende e patrimonio di pueblo aki, y a plama e gobierno geel tur caminda rond di e isla.
Hunto cu boluntarionan Minister Oduber a traha duro pa drecha e edificio aki caminda gobierno di AVP a traha pa desaroyo y progreso di nos pais, pa sigur shete aña largo, prome cu e gabinete a muda pa e edificio di Cocolishi.
Minister O. tabata bon na altura di e maneho cu a wordo hiba pa Gabinete Mike Eman, e plannan cu tabatin pa restauracion di e oficina di gobierno, cu mientras tanto a wordo declara como monumento oficial y cu ta preveni cu den futuro gobierno MEP-POR lo por bende esaki sin mas.
Plannan di restauracion tabata bon conoci pa su persona kende a bay traha den Cocolishi sin nunca mira atras y pa colmo e tabatin dos oficina den un di e seccionnan cu si a wordo restaura caba den e edificio bieu.
Su departamento di publicidad a traha pa Minister Oduber den un sector cu a wordo restaura y drecha prome cu el a bandona gobierno di AVP y pa despues bay traha cu e mesun partido MEP cu a laga e edificio atras den un estado deplorabel y decai, caminda hasta O. Oduber mes a bin yuda verf, pone tapijt y duna un man na su reapertura na 2009.
E seccion cu Minister O. Oduber di gobierno di MEP awor a señala ta dos seccion cu ya no tabata wordo uza y a muda tur e departamentonan sea pa e edificio di Cocolishi of otro luga sperando riba inicio di trabounan di restauracion.
Ta den mesun seccion cu Minister O. Oduber a ilustra den su articulo cu ta decai, su persona a tene cantidad di conferencia di prensa como Minister di Turismo di Gabinete Mike Eman II y si sigui su ponencia, anto su persona tin cu carga mesun responsabilidad pa loke e mes ta trece dilanti e comunicado di fraccion di AVP ta señala.
