Marlon Sneek: 7 Minister di MEP a gasta 16 miyon mas cu nuebe Minister di AVP

E tendencia di partido MEP durante di campaña electoral ta sigui su curso caminda atrobe pueblo por ripara cu politiconan di MEP den Gobierno,  ta sigui ehecuta  e vision geel di “bisa loke bo ta haci pero NO haci loke

“E tendencia di gaña pueblo ta sigui riba mesun ritmo cu loke a sosode durante di bishitanan na cas durante di campaña electoral, caminda a hiba mensahe y informacion pa pueblo, cu no ta cuadra cu e berdad.

Un biaha mas por  a mira con MEP ta trata di troce e berdad sin splicacion husto, tratando di cambia opinion di pueblo riba loke lider di e partido a priminti pueblo pero ta haci net lo contrario.

Gabinete Wever Croes ta conta cu 9 minister, caminda esun di nuebe cu lo maneha e cartera di salubridad publico, ta un minister di carambola  y ni maske cuanto partido MEP trata di duna un splicacion diferente riba e asunto aki, hecho ta keda cu e grito politico di un gabinete di 7 Minister, ta realidad 8 Minister y uno di carambola.

MEP a publica un serie di cifra siman pasa, tratando na bolter e berdad pero lo ta bon pa Gobierno di MEP realisa cu e situacion di awe, no ta mesun cos cu loke  a ser laga atras na 2009 ya cu awendia tur cifra y tur informacion, por ser haya bek den e cuentanan anual cu ta  up to date desde cu Gabinete Mike Eman a goberna.

E cifranan di e cuentanan anual aki ta papia historia cla, caminda ta mustra cu na 2009 Gabinete Nelson Oduber a traha cu 7 Minister y e total di gasto di e gabinete aki, tabata di  55.262.610 miyon, pues cerca di 55.3 miyon florin  y caminda solamente ministerio di Rudy Croes e tempo ey, a gasta e suma di 27.4 miyon florin, cu ta casi net mita di e total di gastonan.

Na 2016 e cifranan ta mustra cu Gabinete Mike su gastonan relaciona cu e 9 Ministernan, a totalisa 39.257.299 miyon cu ta algo mas cu 16 miyon ‘menos’ cu 7 minister di MEP a gasta.

No ta cuestion cu ta Marlon Sneek ta duna informacion incorecto pero ta cifranan cu tur hende por haya bek den e cuentanan anual di gobierno, caminda pa algun aña caba, esakinan ta na ordo y ta percura pa un miho control riba maneho di gobierno pa loke ta su entrada y gastonan.

E solo hecho cu na 2009 na luna di december Gabinete Mike Eman I mester a presenta un presupuesto supletorio pa yuda cubri gastonan no presupuesto di Gabinete Oduber di riba 100 miyon florin, ta bisa hopi di e desaster cu MEP a laga atras pa awo bin pretende cu e situacion lo ta mesun cos cu e tempo ey.

Awendia ta dificil pa conta e tipo di storianan aki, ya cu den e cuentanan anual por haya tur informacion necesario con Gobierno di AVP a ehecuta su presupuestonan al pie de la letra, manera esaki a wordo aproba pa Parlamento,” Parlamentario Marlon Sneek ta mustra.

 

NOV27 GASTONAN