Minister encarga cu Turismo, Salubridad Publico y Deporte, sr. Dangui Oduber a tene su promer reunion cu Director di IMSAN, Dr. J.R. Rajnherc. E reunion a bai den un esfera hopi ameno y positivo.
E mandatario y e Director di IMSAN a discuti hopi punto di interes pa cu IMSAN y a hanja un presentacion amplio di e Director di IMSAN tocante e proyecto pa expansion y renovacion di IMSAN den colaboracion cu Baptist Health South Florida. E proyecto di expansion di IMSAN ta bai ta un inversion di mas o menos 61 miyon florin. E ta un “turn key project” na unda cu e scope ta encera varios aparato nan medico moderno entre otro pa radiologia, liftnan nobo etc. Lo amplia IMSAN cu un departamento di radiologia oncologico y e departamento di dialyse lo wordo amplia pa mas capacidad pa mas pashent. Lo amplia y renova tambe e Spoed Eisende Hulp (SEH) existente, e centro di cirugia ambulatorio lo wordo completa y e centro di wowo lo wordo renova. E director di IMSAN ta sumamente orguyoso di e proyecto aki cu ora wordo finalisa manera programa pa 1 di april 2019, lo conta cu un instituto medico moderno y tambe lo bai conoce 50 cupo di trabounan nobo. E proyecto aki sigur ta un inversion di miyones cu lo contribui na nos economia local.
E mandatario di Salubridad Publico a keda impresiona cu e presentacion di e director di IMSAN, na unda cu e expansion y renovacion di e instituto medico aki situa na San Nicolas ta fit den e vision di e Minister pa bin cu diferente specialismo medico aki na Aruba pa asina disminui e cantidad di pashent cu ta wordo manda den exterior pa tratamento medico specialisa. E Minister ta kere cu esaki ta un bon ehempel di iniciativa pa mas instituto nan medico specialisa wordo construi aki na Aruba den e beneficio di nos comunidad cu tanto ta anhela pa un miho cuido medico.
