Mucha cu wordo lanta den cas , y cu wordo siña con ta haci trabao di cas y cu ta disciplina, nan nivel di integridad ta hopi halto, nan ta crece responsabel, y ta dificil pa bo envolvi nan den cos cu no ta bon.
Tempo moderno a cambia hopi cos, awendia bo ta haya un mucha homber of muhe cu tin 14 aña y su mama tin cu sali trabao pasa chines, pa cumpra cuminda pa famia come, pasobra e mucha homber of mucha muhe no por haci nada den cushina pasobra e no a wordo instrui den esey.
Y motibo di falta di instruccion di trabao di cas, nos ta confronta flohera y rebeldia bao di nos muchanan, pasobra ora no encarga un mucha cu responsabilidad for di chiki e ta desformal y sin respet.
Pero ora bo ta laga un mucha pa su cuenta, cu e ta bini for di scol e no ta haci nada, e no por pasa un basora den cas, e no por laba tayo, su paña ta montona den camber pero e no por laba paña, e no por strika su uniform di scol, e no por baña e cacho, e tin problema cu su propio higiena,y no papia mes di chapi den cura,duna e bestianan cuminda, laba auto, muha mata etc, etc.
Anto nos mes como mayor ta coopera pa libertad bira libertinahe, y asina e ta pasa casi 10 ora pa dia of mas riba telefon, cu bon amigo, y cu mal amigo, cu bon wega y cu mal wega, subi riba website di maldad, participa den wega di gangster y violencia, e mucha tin facebook, e tin twitter, y tur sorto di otro cos , pero den cas su colaboracion ta na zero.
Semper trabao di cas a wordo combina cu estudio, si bo papia cu dokternan den nos comunidad, hendenan den posicion clave , no posicion politico, pero posicion caminda hubentud por mira cu nan ta un modelo pa esnan cu ta lanta awor, tur por splica cu nan a haya encargo tempo nan tabata mucha y nan no a muri, ni tampoco keda sin studia.
Ta tristo pero berdad cu hopi hoben ta pensa y actua violento, pasobra hopi tempo liber sin actividad positivo , ta bruha cabes di hende y ta pone hende haci cosnan cu no ta cumbini.
Ta deber di cada mayor pa instrui nan yiu pa yuda den cas, cual ta algo cu bo no ta tende ni mira ningun instancia ta proclama esey, nos ta den un crisis social pasobra e aspect social den cas a muri. Hopi mayor ta reclama cu nan mes tin cu bini for di trabao, como hende muhe y haci tur cos den cas, pasobra ni e tata ni tampoco e yiunan ta duna un man. Y hopi biaha esaki ta trece discucion, y hasta violencia domestico .
Encargo na mucha tambe ta parti di educacion, pasobra locual bo ta siña e mucha awe, ta pa mañan e porta un bon ama di cas, y un bon esposo cu ta yuda su esposa, y un bon ciudadano cu por duna ehempel cu su conducta y su integridad.
Nos tin hopi divorcio, hopi problema social, hopi violencia domestico, y tur esaki ta bini di falta di educacion na cas for di chiki, y no falta di enseñansa na scol.
Un mucha cu no tin ningun encargo of responsabilidad na cas facilmente lo ta riba caya y facilmente tin tempo pa cana den gang, pasobra su mente ta dirigi riba bagamunderia cu e ta mira na tv y internet, pasobra e gangnan internacional tin website, caminda nan ta demostra con pa aplica violencia y con pa uza arma, y con pa rebeldia, y hopi famia ta sufri sin por saca afo dicon nan yiu a daña den asina corto tempo, pero awe nos ta splicabo con bo yiu a yega asina leu. Y tambe recordabo cu abo tambe mester pone bo parti aserca cual ta comparti trabao di cas cu bo yiu y durante trabao di cas bo ta demostra Amor di mayor y asina papia y duna instruccion di bida.
Nos ta pasando den un tempo dificil, nos ta mira cambio den mucha, cual ta pone nos cu hisa man pone na cabes y yora, pasobra e ta haci dolor ora bo propio yiu bira contra bo, sin sa cu un yiu cu rebeldia contra su mayornan sin ningun motibo, djis pa e haci locual cu e kier, e ta rebeldia contra Dios: Efesios 6 vers 1 te cu 3.Y pa e motibo ey cos lo no bay bon cu ne.
Ta solamente hunto y cu hoooopi oracion nos por yuda otro sali for di e situacion aki, pasobra como mayor bo no por paga malo, cu malo, bo no por aplica violencia, tampoco bo por pone e mucha riba caya, a kedabo un solucion entrega e mucha den man di Dios, y sigui haci oracion p’e pa Dios habri su mente y su curazon, pa asina e por haci bon.
