FootFit Backstage Wellness Salon ta consisti di tres seccion. E prome cu a cera su portanan tabata e parti di cuido di pia como medida di precaucion y despues a sigui e otronan.
Despues di asisti na cursonan organisa door di Departamento di Salud Publico y SVb ta sinti cu nan ta bon prepara pa habri nan portanan, asina Yvonne Simon, gerente, a duna di conoce. Aworaki a pone diferente “signs” den e negoshi. Pa loke ta e parti di higiena, esaki a hunga un rol grandi caba den nan 15 aña di existencia. Constantemente tabata sterilisa nan materialnan. “Awo e ta un Protocol nobo, pero nos tabata aplica e reglanan aki caba. E no a haci hopi diferencia pa loke ta nos maneho di higiena den e establecimento aki,” sra. Simon a splica.
Loke si mester bay haci ta conscientisa e clientenan y minamalisa e cantidad di clientenan pa cada ora. Asina por ehempel, si por atende normalmente 10 cliente den un ora, ta bahe na mita. Traha cita ta algo cu semper nan tabata mantene tambe. Antes un cliente tabata por a bini compaña, pero esaki no por mas. Tur cliente ta warda den auto of tres minuut prome cu su cita. Tur esaki pa evita plamamento di e virus COVID-19 cu a causa cu nan a keda practicamente dos luna cera.
E tabata un reto, segun el a splica, pa habri bek, principalmente pa loke ta maneho structural, no solamente pa e clientenan pero tambe pa trata di mantene empleadonan na trabou.
E parti di retail business a logra habri un poco mas prome, unda cu a traha cu e minimo di empleadonan trahando cu e factornan di higiena. E temporada cu a keda cera a causa un gap den nan operacion. Ta contento di por habri, pero percurando of evitando cu un situacion asina por surgi atrobe. “Continuidad di negoshi ta depende di henter e comunidad pa compronde cu tin un normal nobo y cu cada negoshi tin un Protocol pa sigui cu ta encera aspectonan di higiena y distanciamento social.”
E futuro ta dificil pa pronostica pa nan como comerciante cu awo ta biba dia pa dia. Tur cos ta depende di e poder di compra di e clientenan y no mester lubida cu ainda e frontera ta cera, no tin turista. “Manera cu e tabata antes e no ta, y con e lo ta den futuro ta depende hopi di entrada di nos turismo,” sra. Simon a bisa.
E tabatin palabra di elogio pa e forma con SVb a prepara tur e establecimentonan pa e reapertura di e economia, di e negoshinan.
