E detencionnan a baha, pero e cantidad di controlnan a subi. Esey ta loke por deduci di e trabaonan cu Flexteam di Cuerpo Policial a eherce durante e siman di 12 pa 18 di November. A efectua un total di 120 control durante e siman ey, di cual tabatin 3 detencion, pa droga y buracheria publico.
Otro controlnan
E otro controlnan general cu Flexteam ta eherce ta di bay na e luganan di aglomeracion di custumber, manera Manuelito’s, Hotel Bacarat, casnan di pueblo na Noord y Sero Patrishi. Tambe nan ta bay na Lekker, Olde Molen y Cas Casuela, pa asina tene control vooral riba oranan di ceramento.
Na Eagle Beach tambe nan ta tene control, pa e gruponan di custumber cu ta bay aglomer eynan y ta toca musica duro, disfrutando di bebidanan alcoholico, en particular durante e dianan di fin di siman.
E parkinglot di The Village tambe ta un luga cu ta haya gruponan ta reuni, pa asina disfruta di alcohol y di un manera of otro por causa molester.
Hoben kier a soborna agente cu placa pa lage na paz
Durante un di e controlnan, unda cu a detene dos persona pa droga, agente di Flexteam a haya su mes confronta cu un situacion cu nos tin cu bisa cu el a test su mes. Tabata riba e parkinglot di The Village, ora cu nan a topa cu tres persona para banda di un Suzuki Vitara color oranje. Nan a mira un di e personanan tabata para cu su mokete robes cera manera cos cu e tabata tin algo wanta. Ora cu el a mira auto di polis, di biaha el a hinca su mokete den su saco robes di carson y despues a saca su man bek pafo.
A lanta sospecho cu e persona aki tabata tin droga scondi den su carson. Mirando esaki a dicidi dy bay controla. Yegando cerca dje, e Polisnan a haya holo di marihuana. E porta di chauffeur di e auto tabata habri. Cu un flashlight, e agente a mira cu patras di e sienta di e chauffeur tabata tin un bong.
A base di esaki, a bay ristra na paña di e sospechosonan y riba esun cu a hinca su mokete den su saco robes, a bin haya dos puchi chikito di marihuana. Esaki a wordo confisca pa investigacion.
Den cuadro di esaki, a detene E, naci na Albania, kende ta un studiante. Na dado momento el a bisa e Polis cu e ta cla cu su estudio y e no kier daña esaki. Cu e tin placa y e por regla esey pa asina nan lag’e den libertad pa asina e no mester bay Warda di Polis. Mirando esaki, a bisa E. cu e tabata bezig cu intento di soborno y esaki tambe ta castigabel pa ley. El a indica cu el a haya e droga di un tal G. Den cuadro di esaki, a detene G. naci na Aruba y a hib’e warda.
Homber burachi drumi den baki di mata dilanti misa
Tambe, durante fin di siman, Flexteam, a bin topa na altura di Pro-Catedral San Fracisco de Asis un homber desconoci drumi den un baki di mata banda e caminda. Den cuadro di esey a bay lant’e for di soño. Ta trata aki di e homber MM naci na Peru, kende tabata pata pata burachi. Pa su siguridad y di otro, el a wordo hiba na warda di polis na Shaba, pa asina e por a saca su wayaba.
Spotchecks
Den varios auto a wordo controla y a bin topa cu cantidadanan chikito di marihuana, sakitonan cocaina, algun piedra di cocaina, sker, cuchiu, grinder. Esakinan a wordo confisca y hiba warda.
