A duna un total di 4 grupo di Sociale Verzekeringsbank (SVb) a sigui un curso di Papiamento. Desiree Correa, docente di Papiamento a duna les na 50 empleado cu a haya e necesidad y danki na nan director, ir. Edwin Jacobs, pa nan por profesionalisa nan conocemento di e idioma Papiamento.
Ta grupo cu nunca a haya Papiamento na scol. Ta hopi importante pa siña papia y skirbi un bon Papiamento. Danki na e iniciativa aki, tin 50 hende na SVb cu sa awo con pa skirbi un email, un carta na Papiamento cu tur su regla y ortografia cu ta vigente actualmente.
Mas curso
Segun Correa, en berdad esaki tabata un curso pa principiante cu intencion pa sigui, pa profundisa hopi mas. Ta contento cu ya tin un Doctor den Papiamento cu a habri caminda pa mas posibilidad pa esunnan cu kier sigui desaroya y crece nan conocemento di e reglanan di nos dushi idioma Papiamento. Scol di Idioma di Yolanda Croes, tabata clave den tur esaki, cu a percura pa hinca e curso den otro. Correa a duna e les di Papiamento.
Satisfaccion
Di parti di SVb mes, director Edwin Jacobs a splica cu despues cu a tuma nota cu Minister di Enseñansa a declara aña 2018 como aña di Papiamento, a kere cu ta un bon momento pa por a ofrece e trahadonan na SVb e oportunidad pa sigui un curso di Papiamento, pa profesionalisa nan uzo di nos idioma. A acerca Scol di Idioma Yolanda Croes, cu a cera cuater klas, yegando un total di 50 colega cu a participa y a pasa examen di e curso basico di Papiamento.
Durante seis siman a sigui les cerca Desiree Correa, cu a duna tur e partinan di Papiamento cu ta importante pa por domina y na final a bin hunto pa otorga e diploma na tur 50 colega cu a pasa e curso cu exito. Ademas tabatin un colega cu a yega di pasa e curso basico y a sigui e curso di Papiamento avansa, pa e tambe a gradua y a haya su diploma na nivel di HBO.
SVb ta masha contento pa por a duna un contribucion pa enrikece y mantene nos Papiamento bibo y duna su empleadonan un gran parti cu nunca a haya les di Papiamento of instruccion con pa uza Papiamento manera mester ta. Pues di 108 empleado na SVb, awor 51 ta miho prepara pa defende nan mes den nos idioma Papiamento.
Entusiasmo
E intension ta pa den aña 2019 ofrece e curso aki na e demas empleadonan cu ta desea di sigui e curso di Papiamento avansa. A base di e ley cu ta oficialisa Papiamento, por comunica na Papiamento tambe cu Gobierno. SVb e ora ey tin e obligacion tambe pa contesta na Papiamento y kier tur su empleadonan uza e reglanan y aplica gramatica di Papiamento den forma corecto.
