Omision di Ministerio Publico den investigacion di un suma confisca como labamento di placa, a causa cu Hues a keda cu duda y a declara un homber Sirio liber. Si no bini apelacion di Ministerio Publico den dos siman di tempo, mester entrega e suma di mas cu 100 mil dollar bek na e ciudadano.
Alaeddin Kawaye, un Sirio di 70 aña cu kier a bini Aruba pa inverti, awe tabata dilanti mesa berde pa motibo cu el a yega e isla dia 24 di augustus, 2017 cu e suma di 109 mil dollar efectivo. Na momento cu el a bay declara esaki na autoridadnan di aeropuerto, mesora a dicidi di confisca e dollarnan. Despues cu e no por a duna un prueba, na opinion di Ministerio Publico, cu ta placa limpi a dicidi di hib’e dilanti mesa berde.
Kawaye despues a dicidi di bay Hulanda, unda el a biba e dos ultimo añanan. Como cu e ta bisa cu e placa ta propiedad di dje, cu el a spaar durante 30 aña, el a dicidi di no acepta e oferta pa renuncia na esaki. Y a yega Aruba pa defende su mes dilanti Hues.
Abogado mr. Benvinda de Sousa a represent’e den Corte y na final a gana e caso aki tambe ya cu el a splica Hues cu no tin nada malo cu un homber di e area aki (Siria) tin asina hopi placa efectivo den su poder. “E ta algo normal den nan cultura,” el a bisa Hues.
E acusado tin un ruman na Aruba mientras cu su casa mes a fayece na 2016. Segun el a splica, su ruman a bis’e “bo no tin casa mas, bo no tin yiu. Bin Aruba cu bo placa y inverti bo placa aki.” Asina, segun el a splica, el a coy su placa cu el a spaar, a bende tur e joyanan di oro di su casa. Su ruman a spli’ke, “cambia e dinarnan na dollars y ora bo yega Aruba bo ta cambia nan na florin”, el a declara na Polis y dilanti Hues awe mainta. Pero e storia no a convence Fiscal.
“Polis a scucha’bo tres biaha, y cada bes e storia tabata un tiki diferente,” Hues a bisa e acusado. Su Abogado a cuestiona esaki, pasobra, e ta bisa, su cliente no ta papia bon Ingles y durante interogacion, contrario na e tratamento di e caso awe den Corte, no tabatin un traductor presente. “Nos mes cu ta papia diferente idioma, ora cu ta trata di Hulandes, ta haya problema pa splica debidamente ora cu ta na Hulandes,” sra. De Sousa a bisa.
Fiscal no a kere e storia di e Sirio y a para’riba cu e acusacion di labamento di placa a keda proba. El a mustra cu a deposita 12 mil dollar un dia, y el a declara cu e no ta corda di kico e placa ey ta, y un dia despues a lant’e bek. “Un biaha e ta bisa cu ta perdemento di tempo pa puntr’e procedencia di tur su placa y e siguiente dia di repente e ta corda con el a haya e placa,” e Fiscal a bisa.
A base di ariba menciona, fiscal a pidi un castigo di 5 luna condicional, y 2 aña di prueba.
De Sousa
Abogado mr. De Sousa a splica cu no tin nada straño y ilegal cu e placa di su cliente. Ta placa cu el a spaar henter su bida. E tabata spaar durante casi 30 aña e suma di 300 dollar tur luna. E tabata duna les na hobennan, den idioma Ingles, y e tabata cumpra y bende oro. Despues cu su casa a fayece, el a bende tur e joyanan di oro. “Den nan cultura, nan ta gusta cumpra joyanan di oro, y ta regala esaki pa tur celebracionnan,” e Abogado a splica.
Na final e acusado a bisa Hues: “I am a honest man”.
Hues a dicidi di tuma 5 minuut pa pensa si e ta tuma un decision mesora of e mester pensa mas profundo riba e caso aki pa yega na un veredicto. El a bolbe bisando “mi ta di pensamento cu no a keda legal y convincentemente proba cu e acusado a haci su mes culpabel na labamento di placa”. E Magistrado a sigui bisa cu berdad, manera Fiscal ta bisa, ta trata di un suma grandi di placa cu ta lanta duda. Pero, OM no a prueba cu e dudanan tin fundeshi. “Mi por kere parcialmente e duda di Ministerio Publico door cu no por detaya procedencia di e placa. Pero mi por kere tambe cu ta trata aki di placa gespaar henter su bida y oro di joyanan di su casa cu el a bende,” Hues a bisa.
Di otro banda, OM no a pidi un ayudo legal na autoridadnan di Kuwait pa investiga e transaccionnan di banco di e acusado pa proba nan acusacion. Pa falta di e parti aki sigur, no por condena e acusado y a dicidi di lague liber.
