Di dos e-Curacao Business Seminar ta Djasabra 28 di Mart 2020

1478

Durante un konferensia di prensa na Guardian Group organisadónan The Lab y Infinity Media a anunsiá ku despues di un eksitoso edishon ‘sold-out’ aña pasa nan lo organisá e di dos edishon ariba Djasabra 28 di Mart 2020. Ta trata di un seminario di negoshi y merkadeo digital ku oradornan internashonal i lokal. E próksimo edishon lo tin oradornan di e kompania Microsoft, Korendon Europa i The Brian Carter Group.

E promé edishon a konta cu aproksimadamente 500 persona ku a biba un eksperensia úniko ku hopi informashon práktiko pero tambe kombiná ku entretenimentu. Tabata tin hopi persona di diferente sektor komersial ku a skucha e último desaroyonan den merkadeo digital, storytelling, social media, entrepreneurship y mas.

Un di e oradornan prinsipal ta Miri Rodriguez di Microsoft. Rodriguez ta fungi komo ‘Storyteller’ di Microsoft y ta biaha rònt mundu pa eduká personanan riba e tópiko aki. Awendia pa por kapta un kliente, e kompania mester konta su storia/pitch den forma di un storia. E fenómeno aki ta hopi importante pa tin un strategia di merkadeo eksitoso. Rodriguez lo duna vários ehèmpel kon por implementá esaki den kualke organisashon, grandi of chikitu.

Otro orador for di South Carolina USA lo ta Brian Carter di ‘The Brian Carter Group’. Brian ta un outor y spesialista den merkadeo digital. E la kolaborá ku diferente kompania internashonal manera Universal, NBC, Coco Cola y otro nan riba e tema di merkadeo digital. Pues Brian lo papia riba e desaroyonan riba e tema di facebook, Instagram pero tambe Google Ads.

For di Hulanda Sr Martin de Boer kende ta fungi komo Direktor di Merkadeo na Cordenon Europa lo dirigí su mes riba merkadeo pa e sektor di turismo. Turismo ta kresiendo na Kòrsou y ta sumamente importante pa kada kompania na Kòrsou tin un strategia efisiente pa ku merkadeo. De Boer lo elaborá riba práktikanan eksitoso ku e kompania Corendon ta implementá.

Di e kompania di merkadeo digital The LAB Sr. Diederik Kemmerling y Shima Jimenez lo kompartí kiko e desaroyonan di social media ta na Kòrsou. Kon Kòrsou ta usa social media y kon pa logra mas éksito usando e teknologianan moderno.

Durante kada presentashon lo tin un momento interaktivo unda ku profeshonalnan lokal lo kompartí ku otro nan punta di bista riba e tópiko ku e oradornan internashonal a presentá.

E seminario lo ta di 9 or di mainta te algu pasa di 1 or di mèrdia na Santa Barbara Beach Resort Karchinan ta optenibel na Bruna, Van Den Tweel Zeelandia, Mensing’s Caminada i tambe riba Internet via www.e-curacao.net.

E partnernan ku a uni pa por hasi e seminario aki posibel ta Maduro & Curiel’s Bank (MCB) ku su Mobile Banking inovativo, Guardian Group Live Easy pa tur produkto di seguro y Cpost ku su produkto Punto Mio Business i E-Curacao ta un produkshon di The Lab, Infinity Media supported by C3, BDO, Curacao Airport Holding, CINEX, Massive Productions, Fortuna, Tibbaa (Reinventing Ticketing), Motus Minds, Santa Barbara Beach & Golf Resort