Manera cu 24ora.com a informa den forma di exclusividad ayera nochi, Altocomisario interino di Cuerpo Policial Aruba a duna ordo na polisnan pa no actua contra ningun hende cu faya na e medida di Toque de Queda. Pues pa no detene ningun hende y no duna ningun multa tampoco. Awe mainta Ministerio Publico a indica cu e decision ta basa riba e hecho cu no tin suficiente base legal pa duna multa. Sinembargo, probablemente pa Gobierno no “perde cara”, un rato pasa e mesun Ministerio Publico a informa cu Toque de Queda lo sigui toch!
Desde diabierna tin un Toque de Queda na vigor desde mey di anochi te cinc’or di madruga. Esaki ta un di e medidanan cu Gobierno a tuma contra Covid-19. Segun Ministerio Publico, e TdQ ta un di e medidanan necesario pa baha e contagio di Covid-19 na Aruba. Ta considera e medida necesario pa frena e cantidad di contagio. Di e manera aki ta informa cu Polis lo controla activamente riba cumplimento cu e TdQ y cu desde awe fiscal di husticia lo impone un multa di 1000 florin. Ta conta riba e bon cooperacion di comunidad pa bringa e crisis di Covid na nos pais.
Ta obvio si cu tin un diferencia di opinion grandi entre Gobierno di Aruba y Ministerio Publico, den e motibo pa un Toque de Queda. Gobierno a duna como motibo cu e ta pa evita accidente of suceso riba caya cu lo por percura pa tin herido y asina ocupa cama den e unidad di cuido intensivo na Hospital cu ya caba ta bou presion dor di Covid-19. Di otro banda, Ministerio Publico ta bisa awe cu ta reintroduci e medida aki pa frena e cantidad di contagio
E cambio di maneho di un dia pa otro di Abogado General, mr. Frans van Deutekom, cu alabes ta Procurador General interno, ta un asunto masha cuestionabel y straño. Ta con circunstancianan por a cambia di diaranson anochi cu Gobierno a anuncia e medida aki, hunto cu Altocomisario interino, Vanessa Tjon-Kock, y dos dia despues ta bisa cu no ta sigui cu ne pasobra e no tin suficiente base legal. Por a bisa esey riba e prome dia caba, ora cu a anunci’e y no pa laga henter Cuerpo Policial pasa di berguensa dilanti publico.
Ta parce cu awor cu a mustra claramente cu Fiscal a nenga di sigui un ordo directo di Minister Presidente y Minister di Husticia, cu a draai bek su decision mesora y toch cumpli cu deseo di e crisisteam.
