Departamento di Salud Publico di Aruba (DVG) a informa awe cu tin 22 persona cu tabata infecta cu Covid-19 a recupera. E cantidad di casonan di recuperacion a baha awe, compara cu e otro dianan e siman aki. Di otro banda, tin 69 caso nobo di pashent cu a test positivo pa Covid-19 di cual tur ta residente. Cu esey e total di casonan activo awo ta 1200, mientras a haci 397 test awe. Lamentablemente a informa tambe cu e di tres pashent contagia cu Coronavirus a muri awe, alcansando asina 10 persona cu a perde nan bida desde 13 di maart cu a raporta e prome caso di e virus aki riba nos isla.
Dr. Horacio E. Oduber Hospital a informa cu te na e momento aki tin 27 persona interna den hospital di cual 8 ta den ICU y 19 ta isola riba piso general. Di e lista aki, 2 pashent nobo a drenta ICU y 2 pashent nobo ta interna riba piso general. Mester tene cuenta cu a saca un pashent for di ICU y 9 for di camber regular y por a bay bek nan cas. Tin tres pashent di cual ta wardando resultado di nan test pa verifica si nan ta positivo.
