SMAC ta den ful preparacion pa e siguiente fin di siman di carnaval. Diasabra 4 di februari ta e gran festival di Tumba. Diadomingo mainta pa 11:00am, e figuranan di nos Carnaval lo haci un bishita oficial cerca Prome Minister, mr. Evelyn Wever- Croes pa e traspaso di mando. Pa 1:00pm ta turno pa nos muchanan celebra Carnaval 69 den gran forma den districto di Oranjestad.
Despues cu gruponan a pidi pa cambia rutanan di mucha pa haci esakinan mas cortico e peticion a bin pa toch mantene e ruta tradicional esta e ruta di semper. SMAC a scucha nan comentarionan y peticion pa bay bek na e ruta di tradicional.
Diadomingo awor 5 di februari e Parada Grandi di Oranjestad lo sali pa 1or di atardi for di Aruba Entertainment Center subi Avenida Milo Croes, lo drenta Vondellaan lo sigui te cu Rotonde de Las Americas (Cas di Cultura) y consecuentemente drenta L. G. Smith Boulevard te na ex -edificio di D.O.W.
SMAC y e stakeholdernan ta manda un peticion special na lidernan di grupo pa tene cuenta cu nos muchanan esta pa tin earplugs pa participantenan, pa e muchanan bebe suficiente awa, ta protege contra di solo cu un bon sunblock, paña fresco y sapatonan comodo.
SMAC ta invita publico en general pa disfruta di e actividadnan den e prome fin di siman di februari di forma sano y teniendo cuenta cu nos muchanan paden y pafo di carnaval.
