Fiesta pa apertura di post di Polis tabata “fake”

Cada bes e lema di Nelson Oduber cu campaña ta un cos y goberna ta otro, ta haya mas peso, bou di e actual Gobierno. Den e ultimo campaña politiconan cu awe ta forma parti di e Gobierno a priminti cu den 100 dia di Gobernacion, tur e postnan di Polis di Bario lo ta activo. Awe, no 100 dia pero casi dos aña despues, ainda esaki no ta e caso.
E team di 24ora.com a bishita dos post, un na Mabon y otro na Sero Patrishi, ya cu habitantenan ta yama y reclama cu e postnan aki no ta funcionando y ta reclamando presencia di e funcionarionan policial aki den e barionan.

Fiesta pa apertura di post di Polis tabata “fake”

Loke ta remarcabel cu ta hustamente e actual Minister di Husticia Andin Bikker y Alan Howell, kende ta biba cerca di e post di Polis di Bario na Mabon, ta esnan cu a papia di e temanan aki durante campaña. A constata den ambos bario, cu e postnan aki ta cera. A wordo bisa cu hopi prome cu eleccion, e postnan no tabata operacional mas. Ambos post ta den total destruccion.

Por corda ainda cu na Mabon Kavel, dia prome di juni 2018, tabatin henter un fiesta organisa, door di Alan Howell y Andin Bikker, cu prensa invita pa mustra e prome warda di polis cu nan ta bay activa. Y cu asina nan ta bay haci reapertura of renova e otro postnan di Polis den Bario, cu a demostra den pasado di ta funciona. Pero, segun e habitantenan di Mabon, despues di e bishita di Minister Andin Bikker y Alan Howell cu “a priminti nan shelo y tera pa e area aki” y cu esun di Mabon ta bay ta e prome post cu lo bay reactiva, ningun hende a bin traha bek. Hasta airco y materialnan di e oficina a wordo horta. E oficina of loke tabata e post di Polis di Bario ta un luga bandona y den deterioro.
E post di Sero Patrishi ta den mesun estado cu esun di Mabon. Pues e promesa di Bikker y Howell cu den 100 dia lo reactiva tur Polis di Bario a resulta un “fake promise” mescos cu e promesa di 100 Polis nobo.