Amazona ta candela

E candelanan di mondi na Brasil e aña’ki a alcansa record  pa yega na un total di 72.843, segun e centro di investigacion espacial di Brasil INPE. Tin candela activo na diferente luga di selva amazonico y e preocupacion pa e politica ambiental di e Presidente derechista Jair Bolsonaro ta sigui crece.

Si haci un comparacion cu e mesun periodo di 2018, anto por constata cu esaki a aumenta cu 83%, y e total ta esun di mas grandi desde cu a cuminsa cu e registro na 2013. INPE a bisa cu desde diahuebs siman pasa e imagennan satelital a detecta 9.507 candela nobo di mondi, principalmente den e cuenca di Amazona, cas di e mondi tropical mas grandi di mundo y cual ta wordo considera vital pa contra-aresta keintamento global.

Amazona ta candela

Amazona ta candela. Click link pa mas https://24ora.tv/2Zl8315

Posted by 24ora on Wednesday, August 21, 2019

E imagennan ta mustra e estado di Roraima cubri pa huma preto. Esun di Amazona a declara un emergencia dia 9 di augustus na zuid y den su capital, Manaos. E candelanan di mondi a aumenta na Mato Grosso y Parrá, dos estado agricola. INPE a bisa cu e gran cantidad di candelanan di mondi no por wordo atribui na e temporada seco of solamente debi na fenomenonan natural.

“No tin nada abnormal den e clima e aña’ki of e yobidanan den e region amazonico, cu ta un poco bou di e averahe,” un investigador di INPE Alberto Setzer a comenta.

Comments

comments