Fundacion Hende Muhe den Dificultad y mundo henter ta para keto riba un dia manera awe, dia 25 di november y observa derechonan di hende muhe, en particular violencia contra hende muhe y mucha muhe.
Tur pais ta pone atencion pa violencia di genero, cu parce no ta manera yega na un final. Aki na Aruba, e fundacion ta para keto riba e dia aki, conmemor’e. Hunto cun’e ta cuminsa cu 16 dia di Awareness, unda cu den diferente manera ta crea concientisacion pa loke ta e problematica aki cu tin na Aruba tambe, manera cualkier otro parti di mundo.
E fundacion tambe ta celebrando un otro acontecimiento cual ta 24 aniversario di existencia pa Fundacion pa Hende Muhe Den Dificultad. Poco poco ta hayando bon resultado di e trabaonan cu nan a bin ta eherciendo pa asina hopi aña.
Magali Maduro, kende ta coordinadora na FHMDD, a pasa riba e programa cu a cuminsa awe, caminda cu for di 7’or pa 9’or di anochi, e ceremonia di apertura pa e 16 dianan di Awareness, esta e lanzamento di Orange the World Campaign. Tin pa e ocasion aki invitadonan di exterior, entre otro sra. Villalobos for di Costa Rica y sr. Will for di Tennessee, Merca, kende lo bin yuda y comparti cu e publico nan conocemento cu nan a bin ta acumula durante e añanan aki. E tema pa e aña aki ta “Continuously educating our partners”. E enfoke e aña aki ta Cuerpo Policial, Ministerio Publico y tur esnan cu tin di haber cu husticia.
Aña pasa nan a haya un aanwijzing for di e Procurador General, con pa trata den e casonan aki y awor aki ta bay elabora riba dje y yuda partnernan pa nan por compronde e aanwijzing y con pa haci uzo di dje.
Diamars lo tin encuentro cu Cuerpo Policial. Diaranson y diahuebs lo bay tin conferencia henter dia di 8’or di mainta pa 4’or di atardi den Alhambra Ballroom. KPA como partner, lo ta e enfoke e aña aki, manera ya menciona.
Dia 29 di november lo bay tin apertura di e exhibicion di arte. Ta hayando diferente obra for di nos artistanan local cu ta bay expone na BazRRR. E lo ta un silent auction y loke recauda, lo ta pa e fundacion y su actividadnan.
E siguiente siman lo team up cu Hias, cu ta un organisacion internacional cu ta traha cu refugiadonan den e caso aki. Nan ta trata tambe cu hendenan ta bin Aruba cu ta scapa for di nan pais debi na un problema of otro. Na YMCA nan lo tin un actividad.
Dia 4 di december lo tin un dialogo entre Hias, Slachtofferhulp Aruba y e fundacion mes. Dia 9 di december lo para keto na Hero’s Award, unda cu lo duna atencion na e heroenan di e fundacion, esnan cu durante full aña a sa di coopera cu e fundacion di un manera of otro, sea den forma di donacion of algo otro, pa cual motibo por a sigui haci e trabao cu nan ta haciendo te cu awor aki. Ta 24 aña e fundacion ta den comunidad di Aruba y pa e cantidad di aña aki, nan a haya hopi sosten di e donacion vooral di e comerciantenan na Aruba.
Dia 10 di december lo cera e 16 dianan di Awareness. Esey lo wordo teni na BazRRR tambe unda cu lo tin e silent auction. Ta spera cu henter pueblo di Aruba pasa y bin mira e arte.
24 aña di existencia
Yvonne Spellen, kende ta miembro di directiva, a comenta cu manera cu nan a cuminsa 24 aña pasa, no ta nada di compara cu awo, na 2019, bayendo pa 25 aña. E ta un diferencia grandi pa motibo cu a cuminsa como un grupo di hende bao di guia di Dora Koolman. A cuminsa for di scratch. Mester a huur un luga pa por a habri un oficina di dos camber chikito. No tabata tin un cas pa tuma personanan cu a haya nan mes den problema. Den e tempo ey e fundacion, hunto cu e trahado social cu a haya e tempo ey di parti di Gobierno, mester a cana, rondia, huur un apartamento, un caminda na Aruba, unda cu a kere e persona aki cu su yiunan, lo ta safe pa e problemanan cu e tabata pasando na cas caminda cu e no por a keda biba mas.
Tabata un temporada pa e fundacion hopi dificil. Pero gradualmente Spellen a menciona cu den e añanan a keda lucha, specialmente riba tereno financiero y ta danki na Dios na tur e diferente organisacionnan cu a duna donacion y tin biaha donacionnan basta grandi den e añanan cu a pasa, cu e fundacion por a yega te unda nan ta actualmente. Tin desde 2017, tin e sociaal crisisplan, caminda nan ta haya di parti di gobierno, placa special pa por sigui haci e trabao aki.
E fundacion a cuminsa e tempo ey cu tres trahado. Awor aki nan ta 10 persona trahando na e fundacion. Recientemente a haya e aña aki, dos trahado acerca, cu ta un trahado social y un psicologo. Esey a yuda e fundacion masha hopi mes cu nan por a haci e trabao cu nan ta haci y cu ta gusta, cu ta haci’e na un manera hopi mas miho cu manera a cuminsa na comienso.
E fundacion ta hopi gradicido y ta pesey tambe cu awe kier a para keto un rato, pa por duna un pabien na e fundacion mes cu su 24 aña di existencia.
BazRRR
Di parti di BazRRR Galeria, Jose-Anne v/d Biest a comenta cu desde dia 26 di november, cu kier participa na e subasta y cu kier conoce e artistanan cu a colabora cu e fundacion y tambe pa recauda fondo pa haci proyectonan pa loke ta 2020 en adelante, ta cordialmente invita pa pasa na BazRRR y haci esaki. Oficialmente e apertura di e exhibicion di arte lo ta dia 29 di november.
Idea di e silent auction ta cu hunto cu artistanan local, a logra cerca un coleccion bunita basa riba tema di violencia domestico den e color oranje, pa asina por crea conscientisacion, no solamente durante e siman aki, pero logra haya un obra cu e tema mara na e fundacion, ta crea tambe conscientisacion atrabes di un tempo mas largo. Cada biaha cu un persona bishita e oficina aki of mara su mes na e piesa aki, semper e lo corda cu e obra aki lo sali for di e fundacion, na unda cu bo ta crea conscientisacion a largo plazo pa loke ta e tema delicado di violencia domestico.
Den cuadro di e subasta, BazRRR a extende su oranan di apertura. BazRRR ta habri di 10’or di mainta pa 8’or di anochi, caminda cu comunidad por pasa y bishita e subasta y alabes pone nan bid, pa por ta parti y por tin un di e piesanan di e fundacion den nan coleccion.
Na mes momento dia 10, lo clausura e subasta aki, unda cu e fundacion ta bay invita entre otro notario Rodriguez-Takema, cual lo ta parti di e ceramento di e subasta y na mesun momento tur persona cu a pone un bid riba cada piesa lo ta invita y casi obligatoriamente mester tey pa asina e piesa aki por ta subasta manera cu mester ta.
Ta importante pa ilustra y subraya cu e ganashinan lo bay completamente pa e fundacion y kier motiva comunidad completo pa por fabor, los di e fecha di apertura, haci uzo di e oportunidad pa pasa y conoce un tiki mas di e fundacion durante di e subasta.
Ta preparando un exhibicion cu ta bay ilustra un tiki mas di loke ta e tema di violencia domestico, di e forma aki no solamente haya conscientisacion, pero tambe contribui na e tremendo causa aki y na e plannan cu e fundacion tin pa 2020.
