E idea pa bin c’un Feria di Pasco tabata di Jason Steba di e-Toko. Meta tras di e idea of evento aki tabata pa bin c’un evento cu lo genera mas cliente pa nan plataforma di supermercado.
Aña pasa caba nan a organisa un Feria di Pasco Antiano y esaki a resulta den un exito rotundo. Goriaka Maal, organisado a bisa cu e ta un evento unda cu famia- y amigonan por topa y pasa un rato ameno hunto. Nan mes no por a kere cu e evento por tabata asina grandi.
Hopi biaha nos hendenan na Hulanda no ta logra bay nan isla den temporada di fin di aña pa cual cu e mercado aki ta trece tur e cos dushi cu nan conoce pa nan na Hulanda. e ta un sorto di ‘Ban Topa’ grandi den temporada di fin di aña. Riba e mercado aki por haya ‘ayaca, ham, tur sort’i cos dushi bo lo haya rib’e Feria di Pasco.
Tambe ta bay tin un competencia di ‘Ayaca di Oro’, unda cu e trahadonan di ayaca lo por presenta nan arte den nan ayaca. Lo scoge e miho ayaca di Hulanda pa e fin di aña.
E evento aki lo ta bay ta mas grandi cu aña pasa, segun Goriaka Maal. Esaki ta haci cu esun di e aña aki ta bay un nivel mas halto. E aña aki e organisadonan a cambia di luga. Aña pasa a organis’e na Rotterdam y e aña aki e lo ta na Den Haag, n’e Grote Kerk den curason di Den Haag.
N’e luga aki lo tin mas espacio pa pone mas stand, por carga mas hende. Mas cu claro, lo tin hopi mas cos disponibel. Ademas di e cuminda, lo tin hopi mas cos di boca dushi.
Ta curasha tur hende riba e islanan pa subi www.e-toko.nl pa tira un bista di kico tur e-toko tin di ofrece. Riba e mesun webiste aki tambe por cumpra carchi pa asisti n’e Feria di Pasco Antiano.
E Feria di Pasco Antiano 2023 lo tuma luga dia 3 di december for di 1:00pm te cu 9:00pm. Apertura lo den man di Burgemeester di Den Haag.
“Nos ta kere cu e magnitud aki mester di mas exposicion, tanto di nos mes hendenan cu ta biba na Hulanda, pero tambe e Hulandesnan cu semper ta interesa den nos cultura di cerca y come nos cumindanan crioyo”, Goriaka Maal a bisa.
