Hopi bes riba dialuna e directiva di Arubaanse Voetbal Bond (AVB), federacion di futbol, ta tene nan reunion unda nan ta trata diferente punto. Durante e reunion di dialuna ultimo, nan tabatin basta cos pa atende cu ne. Pa loke ta e relato financiero, n’e momentonan aki nan ta tratando esun di 2022.
Randolf Lacle, presidente di AVB, a indica cu e directiva ta reuni regularmente y mayoria biaha riba dialuna. Nan a pone un dia vast pa reuni y trata e puntonan cu ta asunto diario cu ta trata directiva. Hopi bes tin carta of proyecto cu ta andando p’asina nan por sinta hunto y discuti riba nan. El a sigui indica cu si nan mester tuma un decision, nan lo haci esey.
Tin tres miembro di directiva ta pidi pa mira e relato financiero. Lacle a splica cu esey ta un informacion conoci caba. Segun e presidente, nan a informa e clubnan cu nan ta bezig cu e relato financiero 2022 pa termina cu esaki. Esey ta loke nan tin pendiente y a informa e club na fin di aña, pero e ta tumando un tiki tempo.
Incluso AVB ta trahando cu diferente compania cu ta yudando nan pa por tin e relato financiero cla mas lihe posibel. Na momento cu tin e relato financiero cla lo presenta esaki n’e miembronan.
