Diamars venidero dia 2 di maart, Fundacion Educador Consciente Aruba (FECA) ta organisa su di dos tayer pa mayornan cu e tema: Siňa bo yui respet y wordo respeta.
E prome tayer cu a tuma lugar na februari tabata un exito y a enfoca riba e tema “Keep Your Cool”, unda a siña mayor con pa keda trankil durante momentonan di pleito y tension cu yuinan.
E tayer di 2 maart na Centro Bario Brazil ta siña mayornan con nan tin cu papia cu nan yuinan pa nan sigui instruccionnan y cumpli cu nan tareanan manera splica. Alabes mayornan por yuda nan yui comunica cu otro mucha of hende ora un persona no ta respeta e mucha su limitenan.
Loading…
Reload document 
Open in new tab Psicologo y miembro di directiva di FECA Helen Guda ta splica:
“Den nos cultura e ta importante pa siña nos yui e balor di respet y hopi hende ta mira respet ora mi bisa mi yui pa haci algo, e ta hacie tambe. Den e metodo di Disciplina Consciente (Conscious Discipline®️), nos ta siña mayornan con pa papia y con pa yuda nan yuinan cumpli cu nan instruccionnan sin uza miedo, negociacion of cumpramento di yui, pero enfocando riba habilidadnan manera conexion, comunicacion cla y asertivo y mustr’e visualmente bo expectivanan”.
Fundacion Educador Consciente Aruba a wordo lansa na november 2019 y tin como meta pa contribui na un desaroyo social emocional saludabel di nos muchanan ofreciendo conocemento y practica di Disciplina Consciente na tur mayor, educado y comunidad en general.
E tayer di Siña bo Yui Respet y Wordo Respeta ta tuma luga na Centro Bario di Brazil, diamars 2 di maart di 7pm -9pm.
Pa mas informacion por bishita e Facebook page: www.fb.com/educadorconscientearuba
